एजेन्सी, १८ चैत्र । यूरोपेली देशहरुले रुसलाई ग्याँसको रकम रुबलमा नतिरे आजबाट लागू हुने गरी पाइपलाइन नै बन्द गर्ने भएको छ । रुसी राष्ट्रपति भ्लादिमिर पुटिनले डलर र यूरोमा नभई रुबलमा ग्याँस र तेलको मूल्य तिर्न मध्यरातिसम्मको समय तोकेमा सकिएको छ ।

रुसले युक्रेनमाथि हमला गरेपछि अमेरिका, बेलायतलगायत यूरोपेली युनियन आवद्ध मुलुकहरुमध्ये धेरैले आर्थिक प्रतिबन्ध लगाउँदै आएका छन् । जवाफमा रुसले पनि ती देशहरुले ग्याँस र तेल खरिद गर्न चाहेमा रुबलमा तिर्नुपर्ने शर्त राखेको छ । रकम नतिरे सित्तैमा दिन नसकिने भन्दै पाइपलाइन बन्द गर्ने चेतावनी दिएको छ ।

यूरोप रुसी ग्याँसमा निर्भर छ । यूरोपमा अधिकांश हिटिङ र ऊर्जा रुसी ग्याँसबाट चल्ने गरेको छ । यूरोपले रुसबाट ४० प्रतिशत ग्याँसको उपभोग गर्छ । दैनिक २० करोड देखि ८० करोड यूरो बराबरको ग्याँस रुसले यूरोपमा आपूर्ति गर्छ । यो नेपाली मूल्य २५ अर्ब देखि १ खर्ब रुपैयाँ हुनआउँछ । यूरोपमा रुसले दैनिक एक खर्ब रुपैयाँ बराबरको ग्याँस आपूर्ति गर्छ ।

रुसले रुबलमा ग्याँस खरिद गर्नुपर्ने भनेपछि यूरोपका देशहरु अप्ठ्यारोमा परेका छन् । उनीहरु रुसबाट अन्य देशतर्फ विकल्प हेर्न थालेका छन् । ग्याँसको आपूर्ति कतार, अमेरिका जस्ता देशहरुबाट गर्ने पहल थालेका छन् । तर, त्यो समय लाग्ने र महङ्गो पर्ने हुनसक्छ ।

रुसले रुबलमा मात्र सामान बेच्ने भनेपछि कोइला, धातु, रेयर अर्थ, मल, काठ, गुडागुडीको सामानको मूल्य पनि वृद्धि हुनथालेको छ । कोइलाको मूल्य वृद्धि हुँदा विश्वभर कोइलाबाट उत्पादन हुने विजुलीको मूल्य आकाशिएको छ ।