जापान, थाइल्यान्ड र मलेसियाले शनिबार कोभिड-१९ का नयाँ संक्रमितहरूको संख्या सार्वजनिक गर्दा एउटा समानता थियो । तीन वटै मुलुकमा अहिलेसम्म कै सबैभन्दा धेरै कोभिड-१९ संक्रमितहरू फेला परेको जानकारी दिइयो । एकै दिन जापानमा १२ हजार तीन सय ४१, थाइल्यान्डमा १८ हजार ९ सय १२ र मलेसियामा १७ हजार सात सय ८६ नयाँ संक्रमित देखा परे । यी तीन मुलुकमा कोभिड संक्रमितहरूको संख्या बढ्नुका कारण डेल्टा भेरिएन्ट रहेको भनिएको छ ।

उता अस्ट्रेलियाको सिड्नीमा पनि स्थिति खराब छ । कोभिड महामारी नियन्त्रणका लागि भन्दै लकडाउन जारी गरिएको छ । सिड्नीसमेतमा गरी पूरा न्यू साउथ वेल्समा दुई सय १० जना नयाँ संक्रमित फेला परेको बताइएको छ । यो तथांक शनिबार बिहान सार्वजनिक गरिएको हो । संक्रमितको संख्या बढ्ने र  लकडाउनको विरोध एकैसाथ भइरहेको छ ।

लकडाउनको विरोधमा प्रदर्शन होला भन्ने डरले शनिबार सिड्नीमा करिब एक हजार प्रहरी खटाइएको रोयटर्सले लेखेको छ । सम्भावित प्रदर्शनलाई रोक्न रेल स्टेशन बन्द गरिएका थिए भने ट्याक्सीहरूलाई सिड्नीको मध्यक्षेत्रमा यात्रु ओराल्न निषेध गरिएको छ ।

अस्ट्रेलियाको सबैभन्दा ठूलो सहरमा जस्तै जापानको टोकियोमा पनि लकडाउन छ । ओलम्पिक २०२० जारी रहँदा टोकियोमा चार हजार ५८ नयाँ संक्रमित भेटिएको बताइएको छ । शनिबार टोकियोको स्थानीय निकायले यस्तो तथ्यांक सार्वजनिक गरेको हो । तीमध्ये २१ संक्रमित ओलम्पिकसँग सम्बद्ध रहेको बताइएको छ । जुलाई १ यता ओलम्पिकसँग जोडिएका संक्रमितको संख्या दुई सय ४१ पुगिसकेको छ ।

शुक्रबार मात्रै जापानी सरकारले टोकियोमा अगस्टको अन्त्यसम्मका लागि लकडाउनलाई जारी राख्ने निर्णय गरेको थियो । टोकियोमा मात्रै होइन, यस सहर वरिपरिका अन्य क्षेत्रमा पनि लकडाउन हटाइएको छैन ।

गत शनिबार मात्रै टोकियो ओलम्पिक आयोजना समितिले कोभिडसम्बन्धी नियम उल्लघंन गरेको भन्दै केही पाहुनाहरूको अनुमति पत्र खारेज गरेको छ । ओलम्पिक भिलेज छाडेर अन्यत्र घुम्न निस्केपछि ती पाहुनाहरूको ‘एक्रिडेसन कार्ड’ खोसिएको हो । तर ती खेलाडी रहेको वा नरहेकोमा भने केही खुलाइएको छैन । र, कतिजनाले नियम उल्लघंन गरे भन्नेबारेमा पनि केही सूचना दिइएको छैन ।

मलेसियामा कोभिड संक्रमितको संख्या निरन्तर उकालो लागेपछि सरकारको विरोध भइरहेको छ ।  शनिबार एक सयभन्दा प्रदर्शनकारी क्लालम्पुरको मध्य सहरी क्षेत्रमा जम्मा भइ सरकार विरोधी नारा लगाएका थिए । उनीहरूले प्रधानमन्त्री मुयिद्विन यासिनको राजीनामासमेत मागे । उसै पनि ‘असफल सरकार’ ह्यास्ट्याग सामाजिक सञ्जालमा पहिलेबाटै चलिरहेको छ ।

थाइल्यान्डमा कुल संक्रमितको संख्या पाँच लाख ९७ हजार दुई सय ८७ पुगेको छ । नयाँ संक्रमितको संख्या मात्र होइन मृतकको संख्यामा पनि व्यापक वृद्धी भएको छ । शनिबार जारी गरिएको तथ्यांक अनुसार थप एक सय ७८ ले ज्यान गुमाएका छन् । थाइल्यान्डमा संक्रमितको संख्यामा मात्र नभई मृतकको संख्यामा पनि नयाँ रेकर्ड कायम भएको छ ।

यससँगै कोभिडबाट ज्यान गुमाउने थाइ नागरिकको संख्या चार हजार आठ सय ५७ पुगेको छ । थाइल्यान्ड सरकारका अनुसार मुलुकभर फेला परेका नयाँ संक्रमितमध्ये ६० प्रतिशतमा डेल्टा भेरिएन्ट देखिएको छ । राजधानी बेंगककको मात्र कुरा गर्ने हो भने, नयाँ संक्रमितमध्ये ८० प्रतिशत डेल्टासँग जोडिएका छन् । डेल्टा अन्य भेरिएन्ट भन्दा बढी खतरनाक नभए पनि यो अरुभन्दा चाँडो सर्ने बताउँछन्, सुपाटिक सिरिलाक । उनी थाइल्यान्डको स्वास्थ्य विज्ञान विभागका महानिर्देशक हुन् ।

पूर्वी एसियाका जापान, मलेसिया र थाइल्यान्ड मात्र होइन चीन पनि डेल्टासँग क्रसित बनेको छ । उसको पूर्वी भागमा रहेको नानजिङ सहरमा मात्रै जुलाई २० यता एक सय ९० नयाँ संक्रमित फेला परिसकेका छन् । तीनको संक्रमण इतिहास रुसबाट नानजिङ पुगेका हवाईजहाजसँग जोडिएको बताइएको छ । शनिबार सार्वजनिक गरिएको तथ्यांक अनुसार चीनभर दुई सय ६२ नयाँ संक्रमित देखिएका छन् ।

उता भियतनामले पनि कोभिड नियन्त्रणका लागि थप कडाई गर्ने घोषणा गरेको छ । आगामी सोमबारबाट १९ सहर र सबै प्रान्तमा मानिसको चहलपहललाई रोक्न नयाँ नियम लागू गर्ने बताइएको छ । यस्तो कडाई थप दुई साताका लागि लागू गरिने भियतनाम सरकारले शनिबार जनायो ।

पछिल्ला चार साताको तथ्यांक हेर्दा विश्वका विभिन्न भागमा ८० प्रतिशतले संक्रमण बढेको पाइएको छ । विश्व स्वास्थ्य संगठन (डब्लुएचओ) का प्रमुख टेड्रोस अढानोनले शुक्रबार पत्रकार सम्मेलनलाई सम्बोधन गर्दै यस्तो जानकारी दिएका हुन् । ‘कोभिड महामारी नियन्त्रणका लागि हामीले गरेको सबै मेहेनत खेर जाने अवस्था छ । विश्वका धेरै मुलुककाु स्वास्थ्य व्यवस्था ध्वस्त हुने स्थितिमा पुगेको छ,’ टेड्रोसले भने ।

डेल्टा भेरिएन्ट पहिलो पटक भारतमा भेटिएको थियो । यो रुगा वा फ्लुभन्दा छिटो सर्ने बताइएको छ । युएस सेन्टरर्स फर डिजिज कन्ट्रोलका अनुसार खोप लगाएका मानिसमा पनि यो भेरिएन्टको कोभिड–१९ सर्ने र असर अन्य भेरिएन्टको भन्दा खतरनाक हुने बताएको छ ।

यो समाचार इकागजमा छ ।