रास्वपामा पदाधिकारी चयन सर्वसम्मत गर्ने तयारी, रवि सभापति र बालेन वरिष्ठ नेता रहने संकेत

राष्ट्रिय स्वतन्त्र पार्टी (रास्वपा) ले पहिलो एकता महाधिवेशनबाट एकताको सन्देश दिन शीर्ष पदाधिकारीहरूलाई सकेसम्म सर्वसम्मत रूपमा चयन गर्ने समझदारी बनाएको छ। सचिवालय बैठकले विधान संशोधन गर्दै १५१ सदस्यीय केन्द्रीय समिति गठन गर्ने निर्णय गरेको छ, जसमा १०० जना निर्वाचित र ५१ जना मनोनीत हुनेछन्।

नयाँ व्यवस्थाअनुसार ३ उपसभापति, २ महामन्त्री, ५ सहमहामन्त्री, १ कोषाध्यक्ष, २ सहकोषाध्यक्ष, १ प्रवक्ता र ३ सहप्रवक्ता रहनेछन्। केही पदमा मनोनयनको व्यवस्था पनि राखिएको छ।

स्रोतका अनुसार सभापति, वरिष्ठ नेता, उपसभापति र महामन्त्रीलगायत प्रमुख पदमा चुनाव नगरी सर्वसम्मत नेतृत्व चयन गर्ने तयारी छ। यसअनुसार रवि लामिछाने सभापति र बालेन्द्र (बालेन) शाह वरिष्ठ नेता रहने लगभग निश्चित भएको बताइएको छ।

रास्वपाले विभिन्न राजनीतिक समूह र एकता प्रक्रियामा सहभागी पक्षहरूको प्रतिनिधित्व सुनिश्चित गर्दै नेतृत्व चयन गर्ने रणनीति बनाएको जनाएको छ। महाधिवेशनमा पहिलो चरणमा सभापति र केन्द्रीय समितिको निर्वाचन हुने तथा त्यसपछि पदाधिकारी चयन प्रक्रिया अघि बढ्नेछ।

असार ७ देखि ९ गतेसम्म हुने महाधिवेशनको उद्घाटन सत्रलाई सभापति रवि लामिछाने र प्रधानमन्त्री बालेन्द्र शाहले सम्बोधन गर्ने कार्यक्रम तय गरिएको छ। उद्घाटनपछि नेतृत्व चयन प्रक्रिया अघि बढाइने र असार ८ गतेदेखि निर्वाचन कार्यतालिका लागू हुने रास्वपाले जनाएको छ।