भारतीय संगीतकी दिग्गज गायिका आशा भोसले को ९२ वर्षको उमेरमा निधन भएको छ।

केही महिनादेखि अस्वस्थ रहेकी उनलाई शनिबार मुटु तथा श्वासप्रश्वाससम्बन्धी समस्या देखिएपछि मुम्बईस्थित ब्रिच क्यान्डी अस्पताल मा भर्ना गरिएको थियो। गम्भीर अवस्थामा अस्पताल पुर्‍याइएकी उनलाई आईसीयूमा राखेर उपचार भइरहेको थियो।

७ दशकभन्दा लामो सांगीतिक यात्रामा उनले हजारौँ गीत गाएर भारतीय मात्र नभई विश्व संगीतमा गहिरो प्रभाव छोडेकी थिइन्। उनका गीतहरू पुस्तौँसम्म लोकप्रिय रहँदै आएका छन्।

उनको निधनसँगै भारतीय संगीतले एउटा महत्वपूर्ण युग गुमाएको छ। उनका छोरा आनन्दले आइतबार दिउँसो निधनको पुष्टि गरेका हुन्। भारतीय सञ्चारमाध्यमहरूले पनि यो खबर सार्वजनिक गरेका छन्।

परिवारका अनुसार उनको अन्त्येष्टि सोमबार गरिनेछ।

भारतीय सिनेमाकी सबैभन्दा सफल र लोकप्रिय गायिकामध्ये एक भोसलेको तुलना हिन्दी फिल्म संगीतमा उनकी दिदी लता मंगेशकर सँग गरिन्थ्यो।

सन् १९३३ मा मंगेशकर परिवारमा जन्मिएकी आशाले ९ वर्षको उमेरदेखि नै व्यावसायिक गायन सुरु गरेकी थिइन्। सन् १९४३ मा पहिलो फिल्म गीत रेकर्ड गरेकी उनले १९५० को दशकसम्म आइपुग्दा बलिउडमा आफ्नै पहिचान स्थापित गरिसकेकी थिइन्। त्यसपछि तीन दशकसम्म उनी अधिकांश संगीतकारहरूको पहिलो रोजाइ बनिन्।

सुरुआती समयमा उनलाई नृत्यप्रधान गीतमा सीमित गरिए पनि उनले आफ्नो प्रतिभा विस्तार गर्दै उमराव जान जस्ता फिल्ममा गजल गायनमार्फत उत्कृष्टता प्रमाणित गरिन्।

उनी फिल्मफेयर उत्कृष्ट महिला पाश्र्वगायनतर्फ सात पटक सम्मानित भएकी थिइन्। साथै, ‘दिल चीज क्या है’ र ‘मेरा कुछ सामान’ जस्ता गीतका लागि दुई पटक राष्ट्रिय फिल्म पुरस्कार जितेकी थिइन्।

सन् २०२३ मा हिन्दुस्तान टाइम्स सँगको अन्तर्वार्तामा उनले समकालीन संगीतबारे आफ्ना विचार व्यक्त गर्दै अहिलेका गीतमा उत्कृष्ट शब्दको कमी भएको बताएकी थिइन्। साथै, उनले भिमसेन जोशी का गीत, शास्त्रीय संगीत र गजल सुन्न रुचाउने बताएकी थिइन्।

उनले आधुनिक गायकमध्ये राहत फतेह अली खान र सुनिधि चौहान का केही गीत राम्रो लाग्ने पनि उल्लेख गरेकी थिइन्।