नेकपा (एमाले) का अध्यक्ष केपी शर्मा ओलीले आगामी फागुन २१ गते आसन्न प्रतिनिधिसभा सदस्य निर्वाचन सम्भव नरहेको बताएका छन् । प्राइम टाइम्सको जनता जान्न चाहन्छन् कार्यक्रममा पत्रकार ऋषि थपलियासँग संवाद गर्दै ओलीले हिमाली भेगका मानिसहरु यतिबेला तल–तल झर्ने र विदेश जाने भएकाले त्यहाँ निर्वाचन हुन सम्भव नरहेको बताएका हुन् । हिमाली भेगमा भोट हाल्न मतदाता नै नआउने उनले बताए । बुथमा बाकसमात्रै हेलिकोप्टरबाट खसालेर निर्वाचन नहुने उनको भनाइ छ ।

‘फागुन २१ मा निर्वाचन हुँदैन भन्ने हल्ला पनि छ नि,’ भन्ने जिज्ञासामा ओलीले भने, ‘हुँदैन । किन हुँदैन भने उच्च पहाडी भेग, हिमाली भेगमा त्यहाँका जनता त्यहाँ बसोबास गरिराखेका छैनन् अहिले । ती तल झरेका छन् । हिमाली भेगका मान्छेहरु कि तल झर्छन् कि विदेश जान्छन् । त्यहाँ बुथमा बाकसमात्रै खसालेर हुन्छ ? मतदाता आउनु परेन ? यस्तो पनि चुनाव हुन्छ ? यो हुन सम्भव छैन,’– उनले भने ।

अध्यक्ष ओलीले संसद् पुनर्स्थापना हुनुपर्ने बताए । देशको विरुद्धमा भयानक षड्यन्त्र भइरहेको बताउँदै उनले अहिले देशलाई अराजकतातिर लाने र जनता भड्काउने काम भइरहेको बताए । ‘संसद् पुनर्स्थापना हुनुपर्छ । देशका विरुद्ध भयानक षड्यन्त्र भइराखेको छ । आम मतदाता सचेत हुनुपर्छ । देशमा आगो लगाएर त्यो षड्यन्त्रको सुरुवात भयो । तोडफोडबाट सुरुवात भयो । अहिले पनि अराजकतातर्फ लाने प्रयास भएको छ । सुन्दैछु– सेना लगाएर चुनाव गर्ने रे । भनेको के हो ? मैले बुझिराखेको छैन । जनतामा आतङ्क फैलाउन खोजेको हो कि ?’प्रश्न गर्दै उनले भने ।
RepotersNepal