अष्ट्रेलियाको क्वीन्सल्याण्ड राज्यमा हरेक दुई वर्षमा गरिने नेपाल फेष्टिभल आगामी अप्रिल ६ तारिख आईतबार सम्पन्न हुँदैछ । ब्रिसबेनको मुटु किंग जर्ज स्क्वायरमा गरिने नेपाल फेष्टिभल अघि सांस्कृतिक परेडको आयोजना गरिनेछ । एनआरएन क्वीन्सल्याण्डका संयोजक तथा एनआरएन अष्ट्रेलियाका उपाध्यक्ष शम्भु गाईसीले नेपाल फेष्टिभलको सम्पूर्ण तयारी पूरा भएको जानकारी दिए । यस पटकको नेपाल फेष्टिभलमा क्वीन्सल्याण्डका प्रिमियर डेभिड क्रिसाफोली प्रमुख अतिथिको रुपमा सहभागी हुनेछन् । ब्रिसबेनमा आयोजना गरिएका नेपाल फेष्टिभलमा राजनीतिक नेतृत्व सहभागी भएपनि प्रिमियर नै सहभागी भएको भने यो पहिलो पटक हुनेछ ।

यस्तै अष्ट्रेलियाका लागि नेपाली राजदूत चित्रलेखा यादव ब्रिसबेन पुगिसक्नुभएको छ भने अन्य अतिथिहरु पनि अष्ट्रेलियाका विभिन्न राज्यबाट ब्रिसबेन पुग्नेक्रम सुरु भएको छ । नेपाल फेष्टिभलको पूर्वसन्ध्यामा शनिबार साँझ गाला डिनरको आयोजना गरिएको पनि संयोजक गाईसीले जानकारी दिए ।

उनका अनुसार नेपाल फेष्टिभलको परेड आईतबार विहान १० बजे सुरु हुनेछ । परेडमा घिमे बाजा, झाँक्री नाच, कुमारीको रथसहित विभिन्न सामूदायिक संघसंस्था आफ्नो व्यानर र सांस्कृतिक भेषभूषामा उपस्थित हुनेछन् । यस पटकको नेपाल फेष्टिभललाई ११ हजार डलर बहुसांस्कृतिक अनुदान समेत प्रदान गरिएको छ । परेडपछि कार्यक्रमस्थलमा जम्मा भएर नेपाल फेष्टिभलको सांस्कृतिक कार्यक्रम सुरु गरिनेछ ।

दिउँसो ३ बजेदेखि औपचारिक कार्यक्रम सुरु गर्ने र औपचारिक कार्यक्रम पछि नेपालका राष्ट्रिय कलाकारहरुले आफ्नो प्रस्तुति दिनेछन् । जसमा कन्दरा व्याण्ड, समिक्षा अधिकारी, युवराज चौलागाईं छन् । यस्तै सरगम व्याण्डले पनि आफ्नो प्रस्तुति दिनेछ । नेपाल फेष्टिभलमा दोश्रो पुस्ताका बालबालिकाहरुको प्रस्तुतिलाई विशेष महत्व दिइएको संयोजक गाईसेले जानकारी दिए । विभिन्न सांस्कृतिक प्रस्तुतिहरुमा दोश्रो पुस्ताको उपस्थिति हेर्नलायक हुने उनको भनाई छ ।

एनआरएन अष्ट्रेलियाले यसैवर्ष एडिलेड, मेलबर्न, क्यानबेरा, होबार्टमा नेपाल फेष्टिभल सम्पन्न गरिसकेको छ । त्यसअघि सन् २०२४ मा सिड्नी र पर्थमा नेपाल फेष्टिभ आयोजना गरिएको थियो ।