संस्थाका महासचिव सन्तोष कुँवरले सदस्यहरुलाई एक जानकारीपत्र पठाउँदै आगामी दुई वर्षका लागि नयाँ सदस्यता र नवीकरण खुल्ला गरिएको जानकारी दिएका हुन् । उनले सदस्यहरुले बुझाएको ३० डलरमध्येबाट केही रकम परोपकारी कार्य सञ्चालनका लागि सोसियल वेल्फेयर फन्डमा जम्मा हुने, केही रकम आईसीसीको लेभीका रुपमा जाने र केही रकम सदस्य रहेको राज्यमा बनिरहेको नेपाली कम्युनिटी सेन्टर निर्माणमा समेत योगदान पुग्ने जनाएका छन् ।

एउटा बलियो नेपाली डायस्पोरा निर्माणको यो अभियानमा जुट्न आह्वान गर्दै एनआरएन अष्ट्रेलियाले यस पटक सदस्य संख्या १४ हजारबाट बढाएर २० हजार बनाउने लक्ष्य राखेको पनि महासचिव कुँवरले जानकारी दिए ।

एनआरएन अष्ट्रेलियाले आईसीसीको एमआईएस सिष्टम मार्फत नै सदस्य बन्नका लागि आह्वान गरेको हो । कुँवरले एनआरएन अष्ट्रेलिया आफ्नै विधान अनुसार चलिरहेको र जुन जुलाईमा नै अधिवेशन गर्नेगरी अघि बढेको जानकारी दिए । जुलाई २०२५ मा एनआरएन अष्ट्रेलियाको दुई वर्षे कार्यकालका लागि निर्वाचनमार्फत नयाँ नेतृत्व चयन हुनेछ ।