नेपाली कांग्रेसभित्र नेताहरुको गुट अदलीबदली चलिरहेको छ । १५औं महाधिवेशनमा सभापतिको उम्मेद्वारी दिने तयारीसाथ देशव्यापी अभियान छेडिरहेका डा. शेखर कोइरालाले आफ्नो क्याम्पमा सभापति शेरबहादुर देउवाकै विश्वासपात्र नेता एनपी साउदलाई भित्र्याएको चर्चा छ ।

लामो समय देउवाको क्याम्पमा रहेका साउद पछिल्लो समय शेखरसँग निकट मानिन्छन् । सुदूरपश्चिममा देउवापछिको नेताको छवि बनाएका एनपीले शेखरसँग निकटता बढाएर आगामी महाधिवेशनमा महामन्त्रीको बलियो दाबेदारी प्रस्तुत गरेको पनि चर्चा छ । साउदले अहिलेको कांग्रेस–एमालेको सहकार्यलाई लिएर पनि आलोचनात्मक चेत पस्किएका छन् ।

उनले सार्वजनिक रुपमै चिनियाँ सहयोग परियोजना बीआरआई ऋणमा लिन नहुने भनेर अभिव्यक्ति दिएका छन् । अहिले अध्यादेशको पनि खुलेर विरोध गरेका छन् । सार्वजनिक रुपमा आफ्नो मन्तव्यमा पनि उनले कांग्रेस र एमालेको सहकार्यलाई असर पुर्याउनेगरि टिप्पणी गरेको भनेर चर्चा भैरहेको छ । सभापति देउवाले कञ्चनपुरकै अर्का नेता रमेश लेखकलाई बढि बोकेपछि एनपीले कित्ता चेञ्ज गरेको कांग्रेसी नेताहरुको भनाई छ ।

शेखरकै टिममा रहेर १४औं महाधिवेशनमा महामन्त्रीमा बाजी मारेका गगन थापा भने यतिवेला बुढानिलकण्ठको दैलोमा उभिएको बताईन्छ । यद्धपी थापाले सार्वजनिक रुपमा १५औं महाधिवेशनमा आफ्नो छुट्टै गुट खडा गर्ने उद्घोष गरेका छन् । उनले पछिल्लो एक टिभी अन्तर्वार्तामा हिन्दी डायलग ‘मै जहाँ खडा होता हुँ, वहीँसे लाइन सुरु होता हे’ बोलको अंश सुनाउँदै आफूले खडा गर्ने गुट नै शक्तिशाली हुने महत्वकांक्षी अभिव्यक्ति दिए ।

उनी सभापति देउवासामू यतिवेला असामान्य रुपमा लचक र नरममात्रै देखिएका छैनन्, देउवाको निर्देशन पालनमा अतिररिक्त खातिरदारी निभाईरहेको चर्चा छ । संसदीय सर्वोच्चताको दुहाई दिने गगनले नै संसद् छलेर अध्यादेश ल्याउन विज्ञहरु बटुल्ने र दलको कार्यालयमा प्रदर्शन गर्ने काम गरे । अध्यादेशले देशको कायापलट गर्छ भन्ने गगनले संसदको बाटोमार्फत ऐन बनाउन किन सशक्त भूमिका खेलेनन ? भन्ने प्रश्न उब्जिएको छ ।

तर, अध्यादेशको अस्त्रले अहिले कांग्रेस-एमालेको दुई तिहाईको दम्भको वस्त्र उतारिदिएर निर्वस्त्र बनाईसकेको छ । अध्यादेश राष्ट्रियसभाबाट पारित गर्ने सवालमा जसपा नेपाल नै विपक्षमा उभिएपछि यतिवेला ओली र देउवाको निर्देशन पालना गर्ने गगन थापा र विष्णु रिमालहरुपनि लाजले भुतुक्क भएका छन् । सत्ताको बागडोर सम्हालेका कांग्रेस र एमालेलाई नैतिक संकट उत्पन्न भएको छ ।

शेखरले १५औं महाधिवेनमा सभापतिमा उम्मेद्वारी दिनेगरि कोइराला परिवार एक बनाएको चर्चा छ । सुजाता कोइरालाले त अबको सभापति र प्रधानमन्त्री शेखर नै हुनुपर्छ भनेर सार्वजनिक रुपमै घोषणा गरिसकेकी छिन् । सोही कार्यक्रममा एनपीपनि देखिएका थिए ।

शेखर र सुजाताहरु सँगै देखिएको कार्यक्रममा एनपीले पनि मञ्च सेयर गर्नुलाई बुढानिलकण्ठले राम्रोसँग बुझिसकेको छ । सशांक कोइरालाले पनि शेखरलाई नै साथ दिने धेरैको विश्वास छ । यद्धपी शशांकले सभापति देउवासँग समदुरीको सम्बन्ध राख्दै आएका छन् ।

शेखर र शशांकलाई मिलाउनको लागि उनीहरु पक्षका दोस्रो तहका नेताहरुपनि सक्रियताका साथ लागिपरेका छन् ।१५औं महाधिवेशनको मुखमा पुग्दा नपुग्दै कांग्रेसभित्र धेरै नेताहरुले गुट परिवर्तन गर्ने संकेत अहिले नै प्रष्ट भैसकेको छ ।