काठमाडौँ — तिलोत्तमा नगरपालिकाले १९ वर्षमुनिको नेपाली क्रिकेट टोलीका कप्तान देव खनाललाई ५० हजार रुपैयाँसहित सम्मान गर्ने भएको छ ।

तिलोत्तमा-१३ का स्थायी बासिन्दा रहेका खनालले दक्षिण अफ्रिकामा जारी यू-१९ विश्वकप क्रिकेट प्रतियोगितामा नेपाललाई सुपर सिक्समा प्रवेश गराउन महत्वपूर्ण योगदान दिएकाले उनलाई प्रोत्साहन र हौसला प्रदान गर्न शनिबार आकस्मिक बैठक बसी रकमसहित सम्मान दिने निर्णय गरेको पालिकाका प्रमुख प्रसाशकीय अधिकृत नारायण अर्यालले बताए ।

विश्वकप क्रिकेटमा नेपाली टोलीका कप्तान खनालले नेपालको प्रतिष्ठामाथि उठाउन र टोलीलाई विजयी गराउन महत्वपूर्ण भूमिका निर्वाह गरेको र यसले नगरको सान बढाएको उनको भनाइ छ । खनालले अफगानिस्तान विरुद्ध अर्धसतकियपारीसहित ५८ रनको योगदान दिएका थिए । नगरपालिकाले यसअघि पनि ३ जना खेलाडीलाई नगद जनही ५० हजार रुपैयाँले सम्मान गरेको थियो ।