भारतको दुई दिने भ्रमणमा दिल्ली पुगेका राष्ट्रिय स्वतन्त्र पार्टीका सभापति रवि लामिछानेले त्यहाँ रहेका नेपालीको अवस्थाबारे भारतका लागि नेपाली राजदूत शंकर शर्मासँग छलफल गरेका छन् ।

लामिछानेले राजदूत शर्मासँग दिल्लीस्थित नेपाली दूतावासमा भेटवार्ता गरेका हुन् । लामिछानेको सचिवालयले दिएको जानकारीअनुसार राजदूत शर्मासँग भारतमा रहेका नेपालीको अवस्था र उनीहरूको तथ्यांक व्यवस्थापनबारे छलफल भएको थियो ।

‘भारतका लागि नेपाली राजदूतसँग नेपाल-भारतबीचको आर्थिक, सांस्कृतिक सम्बन्ध थप मजबुत बनाउनेसहित भारतमा रहेका नेपालीको अवस्था, उनीहरूको तथ्यांक व्यवस्थित गर्नेबारे छलफल भएको थियो,’ लामिछानेको सचिवालयले भन्यो ।

शनिबार दिल्ली पुगेका लामिछाने सोमबार बिहान नेपाल फर्किने कार्यक्रम छ । उनीसँग रास्वपाका उपसभापति डीपी अर्याल पनि दिल्ली गएका छन् ।

पार्टीको कार्यवाहक सभापतिको जिम्मेवारी स्वर्णिम वाग्लेलाई दिएर सभापति लामिछाने भारत भ्रमणमा गएका हुन् । ‘भारतमा रहेका नेपाली शुभेच्छुकले आयोजना गरेको कार्यक्रममा भाग लिन’ सभापति लामिछाने र उपसभापति अर्याल भारत भ्रमणमा गएको रास्वपाले जनाएको छ ।