काठमाडौं । चार देश सम्मिलित महिला टी २० आई सिरिजको आफ्नो पहिलो खेलमा नेपाल ताञ्जानियासँग पराजित भएको छ । हङकङस्थित वाङ नाइमा नेपाल २७ रनले पराजित भएको हो ।
जितका लागि १ सय १६ रनको लक्ष्य पछ्याएको नेपाल खराब प्रदर्शन गर्दै १९ बल अघि नै ८८ रनमा अलआउट भयो । सीता राना मगरले सर्वाधिक ४३ रन बनाउँदै एक्लै जितका लागि संघर्ष गरेपनि हार टार्न सकिनन् । कप्तान इन्दु वर्माले १५ र काजल श्रेष्ठले ९ रन बनाईन । अरुले बिर्सन लायक प्रदर्शन गरे । चार जना शून्यमा आउट भए । पूर्वकप्तान रुबिना क्षेत्री एक बल पनि सामना नगरी रन आउट भइन् ।

नेपालको शुरुवात नै निकै खराब रह्यो । पहिलो ओभरदेखि नै विकेट गुमाउन शुरु गरेको नेपालले १७ रनमा पाँच विकेट गुमाइसकेको थियो । एक किनारमा सीता रानामगरले राम्रो खेले पनि उनले अर्को किनारबाट साथ पाउन सकिनन् । उनी ४३ रन बनाएर नवौं विकेटका रुपमा आउट भईन, जतिबेला टिमको स्कोर ८७ थियो र उनी आउट भएपछि नेपालको खातामा एक रन मात्रै थपियो  । ताञ्जानियाका लागि सोफिया जेरोमीले ३, नीमा पिउसले २ विकेट लिईन् ।

यसअघि टस जितेर पहिले ब्याटिङ गरेको तान्जानियाले निर्धारित २० ओभरमा ७ विकेट गुमाउँदै१ सय १५ रन बनाएको थियो । तान्जानियाका लागि हुडा अमोरीले सर्वाधिक २५ रन बनाइन्। एलिसा महतो २१, सौम एमताइले  १६, फतुमा किबासु ११ र मोनिका पास्कल १० रन बनाएर आउट भए । अन्य ब्याटरले दोहोरो अंकको स्कोर बनाउन सकेनन्।  नेपालका लागि संगिता राईले  २ विकेट लिइन्। पूजा महतो, रुविना क्षेत्री र कप्तान इन्दु बर्माले समान एक–एक विकेट बाँडे ।