काठमाडौँ । एसिया कप क्रिकेट प्रतियोगिताको १६औं संस्करण उत्तरार्धतिर लम्पिकएका छ । प्रतियोगिताको फाइनलमा पुग्ने एक टोलीको टुंगो लागिसकेको छ भने अर्को एक टोलीको टुंगो लाग्न बाँकी छ । जारी एसिया कपमा अब तीनवटा खेलमात्र खेल्न बाँकी छ ।

प्रतियोगिताको फाइनल खेल आगामी आइतबार खेलिने छ । अफगानिस्तान र पहिलो पटक एसिया कपमा सहभागिता जनाएको नेपाल समूहगत चरणबाटै घर फर्किएका छन् । ‘सुपर फोर’ चरणमा पुगेको बंगलादेश पनि लगातार दुई खेल हार्दै उपाधि होडबाट बाहिरिइसकेको छ ।

प्रतियोगिता सकिने दिन नजिकिँदै गर्दा धेरैलाई लाग्न सक्छ, आखिर कति पुरस्कार पाउँछन् त विजेता टोलीले ? प्रतियोगिताको मुख्य आयोजक एसियाली क्रिकेट काउन्सिल (एसीसी) ले यसपटक पुरस्कार राशीमा थोरै बृद्धि गरेको बताइएको छ ।

यसपटक एसिया कपका लागि चार  लाख ११ हजार दुई सय ५० अमेरिकी डलर  (करिब पाँच करोड ४४ लाख नेपाली रुपैयाँ) छुट्याइएको छ । त्यसमध्ये प्रतियोगिताको उपाधि विजेता टोलीले दुई लाख अमेरिकी डलर (करिब दुई करोड ६५ लाख नेपाली रुपैयाँ) नगद पुरस्कार हात पार्नेछ ।

यसैगरी प्रतियोगिताको उपविजेता टोलीले एक लाख अमेरिकी डलर (करिब एक करोड ३२ लाख नेपाली रुपैयाँं) नगद पुरस्कार प्राप्त गर्नेछ । ‘सुपर फोर’ चरणको अंक तालिकामा तेस्रो स्थानमा रहने टोलीले ६२ हजार पाँच सय अमेरिकी डलर (करिब ८२ लाख नेपाली रुपैयाँ) नगद पुरस्कार हात पार्नेछ ।

यसैगरी ‘सुपर फोर’ चरणको अंक तालिकाको चौथो स्थानमा रहने टोलीले ३१ हजार दुई सय ५० अमेरिकी डलर (करिब ४१ लाख नेपाली रुपैयाँ) नगद पुरस्कार पाउने छ । यसका अतिरिक्त समूहगत चरणको खेलमा उत्कृष्ट प्रदर्शन गरे पनि ‘सुपर फोर’ चरणमा पुग्न असफल भएको एक टोलीलाई समेत १२ हजार पाँच सय अमेरिकी डलर (करिब १६ लाख नेपाली रुपैयाँ) नगद पुरस्कार प्रदान गरिने छ ।

यसैगरी फाइनल खेलमा ‘प्लेयर अफ दी म्याच’ घोषित हुने खेलाडीलाई पनि पाँच हजार अमेरिकी डलर (करिब ६ लाख ६० हजार नेपाली रुपैयाँ) नगद पुरस्कार प्रदान गरिने समाचारमा जनाइएको छ । यसका अतिरिक्त विजेता टोलीले ‘एसिया कप ट्रफी’ पनि हात पार्नेछ ।

अघिल्लो सिजनको एसिया कप विजेताले करिब दुई करोड ५५ लाख २५ हजार नेपाली रुपैयाँ नगद पुरस्कार पाएको थियो । त्यतिबेला उपविजेता टोलीलाई करिब एक करोड २७ लाख ४५ हजार नेपाली रुपैयाँ नगद पुरस्कार प्रदान गरिएको थियो ।