काठमाडौं । चार देशसम्मिलित महिला टी–२० सिरिजको उपाधि नेपालले जितेको छ । फाइनलमा नेपालले हङकङलाई १३ रनले पराजित गर्दै उपाधि जितेको हो । नेपाल र हङकङबीचको खेलमा वर्षाले बाधा उत्पन्न गरेपछि डकवर्थ लुइस पद्दतिअनुसार विजेता घोषणा गरिएको हो ।यो नेपाली राष्ट्रिय महिला टोलीको पहिलो उपाधि हो ।

टस हारेर ब्याटिङ गरेको हङकङले निर्धारित २० ओभरमा ६ विकेट गुमाएर १ सय १ रन बनाउँदै नेपाललाई १ सय २ रनको लक्ष्य दिएको थियो । तर  जवाफी ब्याटिङमा आएको नेपालले ५.३ ओभर खेलेर  १ विकेटको क्षतिमा बनाउँदै ३७ रन बनाएको अवस्थामा पानीले खेल रोकियो । र नेपालले डकवर्थ लुइस पद्धतिबाट १३ रनले जित निकाल्न सफल भयो ।

नेपालको तर्फबाट  इन्दु बर्माले १९ र सीता रानामगरले १३ रन बनाए ।  काजल श्रेष्ठ शून्यमा आउट हुन पुगिन् ।पहिले ब्याटिङ गरेको हङकङका लागि याशमिन दासवानीले ११, का यिङ चानले २९, मारिना एन्तोनियाले १९ तथा शान्जिन शाहजादले नटआउट १४ रन बनाइन् । बलिङतर्फ नेपालका लागि खुशी डंगोलले ३ तथा अश्मिना कर्माचार्य र कविता जोशीले १–१ विकेट लिइन् ।

नेपालले समूह चरणको पहिलो खेलमा हङकङलाई ६ विकेटले तथा दोस्रो खेलमा कुवेतलाई ३४ रनले पराजित गरेको थियो भने अन्तिम खेलमा मलेसिायासित ६ विकेटले पराजित भएको थियो । यस्तै हङकङ पहिलो खेलमा नेपालसित ६ विकेटले पराजित भएको थियो भने दोस्रो खेलमा मलेसियालाई १० विकेटले तथा तेस्रो खेलमा कुवेतलाई १६ रनले हराएको थियो । नेपाल र हङकङ रनरेटका आधारमा फाइनलमा प्रवेश गरेका हुन् ।

आयोजक मलेसियासहित नेपाल, हङकङ र कुवेत महिला टी–ट्वान्टी सिरिजमा सहभागी भएका थिए । यही अगष्ट ३१ तारिखदेखि मलेसियामै हुने आइसिसी महिला टी–२० विश्वकप एसिया क्वालिफायरको तयारीस्वरुप नेपालले  सिरिज खेलेको हो ।