चर्चित नेपाली रकगायक तथा अभिनेता रविन तामाङको निधन भएको छ । बुढानीलकण्ठस्थित घरमै उनको निधन भएको हो ।

रविनको निधन भएको पुष्टि उनकी दिदी भगवती तामाङ र प्रहरीले गरेका छन् । रोविनको शव पोस्टमार्टमका लागि त्रिवि शिक्षण अस्पताल महाराजगन्जमा राखिएको छ। मृत्युको कारण खुलेको छैन । रविन एण्ड द रिभोलुसन ब्याण्डका भोकलिस्ट समेत रहेका रविन पछिल्लो समय चलचित्र अभिनयमा व्यस्त थिए ।उनको पछिल्लो फिल्म ‘छड्के २’ थियो । नेपाली रक जनराको गीतको विकासमा उनको योगदान उल्लेख्य मानिन्छ ।

लाहुरे परिवारका रविनको जन्म सिंगापुरमा भएको थियो । सिंगापुरमै अध्ययन गरेका उनी अमेरिकी गायक तथा संगीतकार जिमी हेन्ड्रिक्स र रक ब्यान्ड डीप पर्पलबाट प्रभावित थिए । सन् १९९६ मा नेपाल आएका उनका ‘चिसो चिसो हावामा,केटाकेटी,जति माया लाए पनि, भुलमा भुलियो’ जस्ता कयौं गीत युवापुस्तामाझ चर्चित छन् ।

उनले ‘जय परशुराम’, ‘बादशाह जुट’, ‘चिसो एष्ट्रे’, मुखौटा’, ‘छड्के’, ‘नाका’, ‘वान वे’ लगायतका नेपाली फिल्ममा अभिनय गरेका छन् ।उनले हिन्दी वेब सिरिज ‘दि लास्ट आवर’मा समेत अभिनय गरेका छन् ।