राष्ट्रिय भूमि आयोग रुपन्देहीले अब्यवस्थित बसोबासीहरुलाई जग्गाधनी प्रमाणपत्र वितरण गर्न सुरु गरेको छ । आयोगले बुटवल उपमहामनगरपालिका र मायादेवी गाउँपालिकाबाट जग्गाधनी प्रमाणपत्र वितरण सुरु गरेको हो ।
सोमबार बुटवल उपमहानगरपालिका बुटवल वडा नं. १९ का १२ जना र मायादेवीको वडा नं. ८ का ६ जना गरी १८ जना जग्गाधनीलाई आयोगका केन्द्रीय अध्यक्ष केशव निरौला,जिल्ला अध्यक्ष हरिबहादुर आचार्यले जग्गाधनी प्रमाणपत्र वितरण गरेका छन् ।
आयोगका केन्द्रीय अध्यक्ष निरौलाले संविधानमा नै भुमिहीनलाई जग्गाको स्वामित्व दिने ब्यवस्था भएकाले आयोगले सोही अनुसार काम गरेको बताए । भूमि आयोग र स्थानीय तहको समन्वयबाट नै जग्गाको नापँचाज हुँदै लालपुर्जा वितरण सम्भब भएको उनले बताए ।
जिल्लामा करिब १ लाख अब्यवस्थित, सुकुम्बासी तथा भूमिहिन रहेको आयोगका जिल्ला अध्यक्ष हरिबहादुर आचार्यले बताए । अहिले बुटवल, देवदह, सैनामैना, कञ्चन, मायादेवी र सिद्धार्थनगरमा नापजांच सकिएर लालपुर्जा वितरणको अन्तिम चरणमा रहेको आचार्यले बताए । जग्गाधनी प्रमाणपत्र तयार भएपनि सरकारले लिने राजश्व बढी हुँदा जग्गाधनीले प्रमाणपत्र लिन नसकेको भन्दै उनले सरकारले राजश्वको दरलाई कम गर्नुपर्ने सुझाव दिए ।
बुटवल उपमहानगरपालिकाका मेयर खेलराज पाण्डेयले अब्यवस्थित जग्गाको ब्लक छुट्टाइएको र नापँचाज भएका जग्गाको विधि, प्रक्रिया कानुन अनुसार लालपुर्जा वितरण गरिएको बताए । बुटवलमा अब्यवस्थित बसोबासीको समस्या धेरै रहेको बताउँदै राष्ट्रिय भूमि आयोगले आफ्नो कामलाई तिव्रता दिएर जनतालाई आफ्नो जग्गाको मालिक बनाउनु पर्नेमा उनले जोड दिए ।
बुटवलमा करिब ३० हजार अब्यवस्थित रुपमा बसोबासमा रहेको उपमहानगपालिकाले जनाएको छ । आयोगका बिज्ञ सदस्य बद्रे आलमले रुपन्देहीका १० वटा पालिकामा आयोगले कामलाई तिव्रता दिएको बताए ।