काठमाडौं । निर्वाचन आयोगले दोलखाका १० वटा मतदान केन्द्रमा आज (बिहीबार) मतदान हुने भएको छ । मुख्य निर्वाचन अधिकृत डिल्लीरत्न श्रेष्ठका अनुसार आज मतदान हुन लागेको हो । करिब आठ हजार मतदाताले आज मतदान गर्नेछन् ।

आयोगको यही मंसिर ११ गते बसेको बैठकले दोलखाको वैत्यश्वर गाउँपालिका–६ का वैत्यश्वर माध्यमिक विद्यालय मतदान केन्द्रको क, ख, ग, वडा नम्बर २ को जनज्योति माध्यमिक विद्यालय पुतली काठका मतदान केन्द्र क र ख, तामाकोसी गाउँपालिका–३ हेल्थपोस्ट भवन जफे मतदान केन्द्रका क र ख गरी सात वटा मतदान केन्द्रमा यही मंसिर ४ गते सम्पन्न भएको निर्वाचनलाई रद्द गरी सोही ठाउँमा पुनः मतदान गर्ने निर्णय गरेको थियो ।

आयोगले वैत्यश्वर वडा नम्बर ३ को कालीढुङ्गा मावि मतदान केन्द्रमा क, ख, ग मतदान केन्द्र भएको मतदानलाई पनि रद्द गरी पुनः मतदान गर्ने निर्णय गरी उक्त दिन पुनः मतदान सम्पन्न गर्न मुख्य निर्वाचन अधिकृतको कार्यालय दोलखालाई निर्देशन समेत दिएको थियो ।
यी हुन पुनः निर्वाचन हुने बुथ

१) बैत्यश्वरको वडा नं. ६ (क, ख, ग)

२) वैत्यश्वरको ३ कालीढुङ्गा (क, ख, ग)

३) बैत्यश्वर २ को जनज्योति (क, ख)

४) तामाकोसीको हेल्थपोस्ट (क, ख)