काठमाडौँ । प्रतिनिधिसभाका १६५ निर्वाचन क्षेत्रमध्ये ४ र प्रदेशसभाका ३३० निर्वाचन क्षेत्रमध्ये चार वटाको नतिजा सार्वजनिक भएको छ । अहिलेसम्म नेपाली कांग्रेसले प्रतिनिधिसभाका ३ र प्रदेशसभाका ३ निर्वाचन क्षेत्रमा जीत हासिल गरेको छ ।

कांग्रेसले प्रतिनिधिसभा अन्तर्गत, काठमाडौँ १, मनाङ र मुस्ताङ तथा प्रदेशसभा अन्तर्गत मनाङ क र मुस्ताङको क र ख प्रदेशमा जीत हात पारेको हो । एमाले प्रतिनिधिसभा अन्तर्गत ललितपुर २ मा विजयी भएको छ । पछिल्लो नतिजाअनुसार काठमाडौँ क्षेत्र नम्बर १ बाट नेपाली कांग्रेसका उम्मेदवार प्रकाशमान सिंह निर्वाचित भएका छन् ।

सिंहले ७ हजार १४३ मत प्राप्त गरेका छन् । उनका प्रतिद्वन्द्वी राष्ट्रिय प्रजातन्त्र पार्टीका उम्मेदवार रवीन्द्र मिश्रले ७ हजार १८ मत प्राप्त गरेका छन् । ललितपुर क्षेत्र नम्बर २ मा नेकपा एमालेका प्रेमबहादुर महर्जन विजयी भएका छन् । निकटतम प्रतिस्पर्धी हाम्रो नेपाली पार्टीका सुदिन शाक्यलाई ६ हजार भन्दा धेरै मतले पछि पार्दै एमालेका महर्जन विजयी भएका हुन् ।

यस्तै हिमाली जिल्ला मनाङबाट प्रतिनिधि सभा सदस्यमा नेपाली कांग्रेसका टेकबहादुर गुरुङ विजयी भएका छन् । कांग्रेसका गुरुङले २ हजार ५ सय ७५ मत ल्याए भने एमालेका गुरुङले २ हजार २ सय ४७ मत ल्याएका छन् । यसैगरी मनाङको प्रदेश सभा क्षेत्र नम्बर क मा नेपाली कांग्रेसका मुनिन्द्रजंग गुरुङ निर्वाचित भएका छन् ।

नेकपा एमालेका राजनबहादुर गुरुङलाई पराजित गर्दै कांग्रेसका मुनिन्द्रजंग गुरुङ निर्वाचित भएका हुन् । मनाङ ‘ख’ मा स्वतन्त्र उम्मेदवार दीपक मनाङ्गे भनिने राजीव गुरुङको मात्रै उम्मेदवारी परेको थियो । मुस्ताङमा नेपाली कांग्रेसले क्लिन स्विप गरेको छ ।

प्रतिनिधि सभातर्फ एउटा र प्रदेश सभातर्फ दुई वटा निर्वाचन क्षेत्र रहेको मुस्ताङका सबै सीटमा कांग्रेसले जीत हासिल गरेको हो । प्रतिनिधि सभातर्फ कांग्रेसका उम्मेदवार योगेश गौचन थकाली विजयी भएका छन् । यस्तै मुस्ताङको प्रदेशसभा ‘क’ मा नेपाली कांग्रेसका नाम्डु गुरुङ र प्रदेशसभा ‘ख’ मा कांग्रेसकै विकल शेरचन विजयी बनेका छन् ।