मेलबर्न । ब्याटस म्यान बेन स्टोक्सको बहादुरीपूर्ण प्रदर्शनको मद्दतले इङल्याण्डले पाकिस्तानलाई पाँच विकेटले पराजित गर्दै आइतबार ट्वान्टी–२० विश्वकपको उपाधि जितेको छ । इङल्याण्डले १२ बर्षपछि वान डे विश्वकपको च्याम्पियन बनेको हो ।

यस्तैमा इङल्याण्ड वान डे तथा ट्वान्टी–२० विश्वकप दुवैको एकै समय विजेता रह्यो र दुर्लभ उपलब्धी आत्मसात गर्न सफल रह्यो ।
मेलबर्न क्रिकेट मैदानमा जितका लागि १३८ रनको लक्ष्य पाएको इङल्याण्डले १९ ओभरमा पाँच विकेट गुमाएर विजयी रन बनायो । स्टोक्सले दबाबको स्थितिमा ५२ रन बनाउँदै नटआउट रहे । ट्वान्टी–२० क्रिकेटमा उनको यो पहिलो अर्धशतक हो । उनलाई मोइन अलिले बलियो साथ दिए र उनले महत्त्वपूर्ण १९ रन बनाए । त्यसअघि कप्तान जस बटलरलले २६ रन बनाएका थिए ।

पाकिस्तानी बलर साहिद अफ्रिदी चोटका कारण मैदान छाड्न बाध्य रहेपछि खेल इङल्याण्डको पक्षमा मोडिएको हो । इङल्याण्डले टस जितेर पहिले फिल्डिङको निर्णय गरेको थियो । त्यस क्रममा उसले कसिलो बलिङ तथा सटिक फिल्डिङको मद्दतले पाकिस्तानलाई २० ओभरमा आठ विकेट गुमाएर १३७ रनमा रोकेको थियो ।

पाकिस्तानका लागि सन मसुदले ३८ रन बनाए र यो नै व्यक्तिगत उच्च स्कोर रह्यो । यस्तै कप्तान बाबर आजमले ३२ तथा सादब खानले २० रन बनाए । पाकिस्तानले नियमित अन्तरमा विकेट गुमाएपछि चुनौतीपूर्ण स्कोर खडा गर्न सकेन । इङलिस बलरमध्ये साम करन सबैभन्दा सफल रहे र उनले १२ रनमा तीन विकेट लिए । यस्तै अदिल रसिद र क्रिस जोर्डनले दुई दुई विकेट हात पारे ।