रुपन्देही । जनमत पार्टीका अध्यक्ष डा.सीके राउतले रावण राज अन्त्य गर्न जनमत पार्टीमा मतदान गर्न आग्रह गरेका छन् । पुराना राक्षस रुपी दलहरुबाट देशको परिवर्तन सम्भव नरहेको भन्दै राउतले यसपटक त्यसको विकल्पमा जनमत पार्टीको हरन छापमा मतदान गर्नुपर्ने बताए ।
रुपन्देहीको क्षेत्र नम्बर ४ मर्चवारको चुनावी सभालाई सम्बोधन गर्दै डा.राउतले पुराना र आफूलाई ठुला भन्ने दलहरु जनतामा जान डराई रहेको बताए । जनताका लागि कुनै काम गर्न नसकेकोले सत्ता , शक्ति आफ्नै हातमा भएपनि दलहरु एक्लै जनतामा जान नसकेको बताउँदै अहिले पाँच पाँच दलको दुई गठबन्धन बनाएर चुनाव लड्नु पर्ने अबस्था आएको राउतले आरोप लगाए ।

राउतले भने , “जनताको बिचमा दलहरु जान सकेका छैनन् । एकातिर पाँच दल र अर्को तिर पाँच दलको गठबन्धन छ । यो गठबन्धन होईन ठगबन्धन हो । यो राक्षस रुपी ठगबन्धनबाट सबै सचेत भएर यसपाली रावण राजको अन्त्य गर्न जनमत पार्टीलाई मतदान गर्नुहोस् । ”

सामुदायिक समाजवाद ल्याउन , जनता राज ल्याउन डा.राउतले देशै भरि जनमत पार्टीका उम्मेदवारहरुलाई मतदान गर्न आग्रह गरे । त्यस्तै , रुपन्देही क्षेत्र नम्बर ४का प्रतिनिधी सभाका उम्मेदवार भोपेन्द्र प्रसाद यादवले मर्चवारको परिवर्तन गर्नका लागि जनमत पार्टीको विकल्प नभएको बताए । यादवले मर्चवारमा मलखाद्, सिंचाई ,विउँ विजन, स्वास्थ्य ,शिक्षा, सडक ,पुर्वाधार लगाएतका काममा मर्चवार निकै पछाडी परेको हुँदा त्यसको परिवर्तनका लागि जमिनदारी शासक वर्गको विकल्पमा जनमत पार्टीलाईनै मतदान गर्न आग्रह गरे ।

कार्यक्रममा प्रदेश सभाका उम्मेदवार ४(क)का जितेन्द्र नाथ शुक्ला (बब्लु) र (ख)का अर्जुन जैसवालले पनि मर्चवारको परिवर्तनको लागि जनमतलाई एक मौका दिनु पर्ने बताए । रुपन्देहीको मर्चवार , सम्मरिमाई , मायादेवी गाउँपालिका र लुम्बिनी संस्कृति नगरपालिकाको विभिन्न स्थानमा कार्यक्रमको आयोजना गरिएको थियो ।