बझाङ । बझाङमा जीप दुर्घटना हुँदा कम्तीमा आठ जनाको ज्यान गएको छ । मष्टा गाउँपालिका–१ मा यात्रुवाहक जीप दुर्घटना हुँदा आठ जनाको घटनास्थलमै ज्यान गएको प्रहरीले जानकारी दिएको छ ।

मृत्तकमध्ये चार जनाको सनाखत भएको प्रहरीले जानकारी दिएको छ । प्रहरीका अनुसार मृत्यु हुनेमा मस्टा खेतकोटका १२ वर्षीया सम्झना खड्का, १५ वर्षीय रोशन खड्का, ११ वर्षीय प्रचण्ड खड्का र २८ वर्षीया बसन्ती धामी रहेका छन् ।

‘दुर्घटनामा परेको जीप टुक्रा–टुक्रा भएको छ, अहिले घाइतेलाई उद्दार गरेर अस्पताल लैजादैछौँ,’ बझाङका डीएसपी जागेश्वर भण्डारीले भने । मष्टा गाउँपालिकाका सूचना अधिकारी पृथुराज जोशीका अनुसार दुर्घटनामा परेकामध्ये आठ जनाको घनास्थलमै ज्यान गएको हो ।

‘अहिले पनि उद्धार जारी छ । ६ जनालाई जिल्ला अस्पताल लगिएको छ’, उनले भने, ’मानवीय क्षतिको संख्या अझै बढ्ने सक्ने अवस्था छ ।’ सदरमुकाम चैनपुरबाट मष्टा गाँउपालिकाको वडा नं २ खेतकोट जाँदै गरेको सु.प.प्र ००१–००१ च ११७ नम्बरको जीप सडकबाट झण्डै दुई सय मिटर तल खोल्सामा झरेर दुर्घटना भएको हो । सडकबाट खसेको जीप भीरमा अड्किएको छ । जीपमा कति जना सवार थिए भन्ने एकीन हुन नसकेको प्रहरीले जनाएको छ ।