प्रधानन्यायाधीश चोलेन्द्र शमशेर राणा र प्रधान सेनापति पूर्णचन्द्र थापाबीच सोमबार भेटवार्ता भएको छ । सर्वोच्च स्रोतका अनुसार सेना र सर्वोच्च अदालतबीच देखिएको जग्गा विवादका विषयमा कुराकानीका लागि थापा राणालाई भेट्न सर्वोच्च गएका हुन् ।
‘सर्वोच्च अदालतको पछाडिपट्टि सेनाको जग्गा छ । त्यो जग्गामा सर्वोच्चले भौतिक संरचना बनाएकोमा सेनाले हटाउन भनेपछि यही विषयमा कुराकानीका लागि प्रधानसेनापति सर्वोच्च आउनु भएको हो’, सर्वोच्च अदालत स्रोतले रातोपाटीलाई भन्यो ।

सोमबार दिउँसो थापालाई राणालाई भेट्न थापा उनको कार्यकक्षमै पुगेका थिए ।

कतिपयले प्रतिनिधिसभा विघटन विरुद्धको मुद्दा फैसला अन्तिम चरणमा पुगेको बेला प्रधानन्यायाधीश र सेनाका प्रमुखबीचको भेटलाई अर्थपूर्ण रुपमा हेरेपनि सर्वोच्च स्रोतले भने यसबारे कुनै कुराकानी नभएको स्पष्ट पारेको छ ।
यसैबीच जंङ्गीअड्डाले सिंहदरबार परिसरको जग्गाको समन्वयका लागि भेट भएको जानकारी दिएको छ ।

सिंहदरबार परिसरमा सेनाको स्वामित्वमा रहेको ९ रोपनी जग्गामा सर्वोच्च अदालतले भवन बनाउन लागेको र सो बारेमा छलफल गर्न प्रधान सेनापति सर्वोच्च पुगको सैन्य प्रवक्ता सहायकरथी सन्तोष बल्लभ पौडेलले रातोपाटीलाई बताए ।

उनले भने–‘सर्वोच्च पछाडि नेपाली सेनाको पुरानो क्यावेलरीमा भवन बन्न लागेको छ, त्यसबारे समन्वयका लागी उहाँ प्रधानन्यायाधिशसँग भेट्न जानुभएको हो ।’