धरान।नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ धरानका मेयर हर्क साम्पाङले चलाएको वृक्षारोपण अभियानमा सहभागी भएका छन् । शुक्रबार जनवादी गायक जेबी टुहुरेको स्मृतिमा आयोजित कार्यक्रममा सहभागी हुन धरान पुगेका अध्यक्ष प्रचण्ड साम्पाङको वृक्षारोपण अभियानमा सहभागी भएका हुन् । सर्दु जलाधार क्षेत्रमा हुन लागेको वृक्षारोपण कार्यक्रममा प्रचण्ड सहभागी भएका हुन् । वृक्षारोपण अभियानमा सहभागी भएपछि अध्यक्ष प्रचण्डले मेयर साम्पाङले कम्युनिष्टहरुले गर्नुपर्ने काम गरीरहेको बताए । ‘सिंगै देशले उहाँको कामलाई बडो गम्भीरतापूर्वक हेरेको छ,’ प्रचण्डले भने, ‘हामी कम्युनिष्टहरुले र अझ खासगरि माओवादीले गर्नु पर्ने काम उहाँले गरिराख्नु भएको छ।’ उनले आफ्ना पार्टीका नेता, कार्यकर्तालाई हर्कको कामबाट प्रेरणा लिन समेत आग्रह गरे। ‘म पार्टीका साथीहरु र देशका सबै श्रमजीवी जनतालाई पनि हर्कको व्यवहारबाट, उहाँको आचरणबाट प्रेरणा लिन अनुरोध गर्न चाहान्छु,’ प्रचण्डले भने। प्रचण्डले अर्को प्रसङ्गमा धरानको मेयर र उपमेयरको जोडी मिलेको पनि बताए । उपमेयर आइन्द्रविक्रम बेघा र साम्पाङ्गको जोडी मिलेको उनको भनाई छ ।