नेपाली काँग्रेसले शनिबार पनि महानगर र उपमहानगरपालिकामा पार्टीको उम्मेदवारहरू चयन गर्न सकेन । उम्मेदवारहरू टुङ्गो लगाउन पार्टीका शीर्ष नेताहरू बालुवाटारमा जुटे पनि ठोस सहमति हुन नसकेको हो ।

काँग्रेस सहमहामन्त्री बद्री पाण्डेकाअनुसार काँग्रेसका शीर्ष नेताको बैठकमा आज ठोस कुनै छलफल भएन । अमेरिकी सांसद र गठबन्धनका शीर्ष नेतासँगको छलफलमा प्रधानमन्त्री व्यस्त हुँदा बैठकमा घनिभूत छलफल हुन पाएन । उनले भने, ‘महानगरको उपमेयरमा पनि धेरैको नाम सिफारिस भएकाले नेताहरू सहमति पुग्न सक्नु भएको छैन ।

सहमति नजुटेपछि भोलि बिहान ९ पार्टी कार्यालय सानेपामा शीर्ष नेताबीच अनौपचारिक छलफल हुने र ११ बजे बस्ने केन्द्रीय कार्यसम्पादन समिति बैठकले यसबारे अन्तिम निर्णय लिनेछ । नेताहरूबीच सहमति नजुट्दा शुक्रबार बस्ने भनिएको कार्यसम्पादन समिति बैठक शनिबारलाई सारिएको थियो । शनिबार बिहान ११ बजे बस्ने भनिएको बैठक पछि ३ बजे तय गरिएको थियो । तर महानगरका मेयर उपमेयरबारे शीर्षमा सहमति जुट्न नसकेपछि बैठक आइतबारका लागि सारिएको छ ।

काँग्रेस स्रोतका शुक्रबार काठमाडौँको मेयरको उम्मेदवारका सिर्जना सिंहको नाममा सहमति भए पनि ललितपुर र विराटनगरको मेयरमा निर्णयमा पुग्न सकिएको छैन । सत्ता गठबन्धनभित्र चुनावी तालमेलको सिट बाँडफाँटमा काँग्रेसको भागमा तीन महानगरपालिका मेयर र उपमेयर परेको छ ।

काँग्रेसले काठमाडौँ, ललितपुर र विराटनगर महानगरपालिका प्रमुखमा गठबन्धनबाट साझा उम्मेदवारी दिँदै छ । यस्तै भरतपुर, पोखरा र वीरगञ्ज महानगरपालिका उपप्रमुखमा गठबन्धनबाट साझा उम्मेदवारी दिने छ । त्यस्तै काँग्रेसले धरान, इटहरी, कलैया, बुटवल, तुलसीपुर, नेपालगञ्ज र धनगढी उपमहानगरपालिका प्रमुखमा पाएको छ भने जितपुर सिमरा, हेटौँडा र घोराही उपमहानगरपालिकामा उपप्रमुख पाएको छ ।