काभ्रे। पूर्वमन्त्री गोकुलप्रसाद बाँस्कोटाले आगामी निर्वाचनले राजनीतिक स्थायित्व आउने बताएका छन्। निर्वाचनमार्फत् आउने नयाँ जनादेशले समृद्ध नेपाल सुखी नेपाली बनाउने बताएका हुन्।

बनेपा नगरपालिका–१० स्थित नेकपा वडा कमिटीको अगुवा कार्यकर्ता भेलालाई आज सम्बोधन गर्दै उनले यस्तो बताएका हुन्। गत निर्वाचनका बेला गरेका प्रतिबद्धता अनुसारको काम नभए जनतासामु ‘कान समातेर उठबस’ गर्न तयार रहेको बताए। ‘विकास र राजनीतिका विषयमा प्रतिपक्ष बनेकाले मेरोजति सामना गर्नु तयार हुनु’ नेकपाका केन्द्रीय सदस्यसमेत रहेका बाँस्कोटाले थपे।

उनले आफ्नै सांसद पद खुस्केजस्तो सरकारविरुद्ध सडकमा स्वार्थी ‘कम्युनिष्टधारी’ले कोकोहोलो मच्चाएको आरोप लगाए। कार्यक्रममा बनेपा नगरप्रमुख लक्ष्मी नरसिंह वादे, नेकपाका जिल्ला नेता चन्द्रबहादुर थापा, मुक्ति विष्ट, आत्माराम थापालगायतले विकासको मेरुदण्ड नेकपा नै रहेको बताए। सो अवसरमा पार्टी वडा कमिटी तथा जनवर्गीय सङ्गठनको तदर्थ समिति घोषणा गरिएको थियो। रासस