भारतविरुद्धको एकदिवसीय सिरिजअन्तर्गत बुधबारको पहिलो खेलमा घरेलु टोली दक्षिण अफ्रिका ३१ रनले विजयी भएको छ । २९७ रनको विजयी लक्ष्य पछ्याएको भारतले ५० ओभर नै ब्याटिङ गरे पनि ८ विकेट गुमाएर २६५ रन मात्र बनाउन सक्यो ।

उसका लागि शिखर धवन, विराट कोहली र शार्दुल ठाकुरले अर्धशतकीय पारी खेले । सर्वाधिक ७९ रनको योगदान दिएका धवनले ८४ बलमा १० चौका प्रहार गरे । कोहलीले ६३ बलमा ३ चौकाको मद्दतले ५१ रन जोडे ।

५० रनमा अविजित रहेका ठाकुरले ४५ बलमा ५ चौका र १ छक्का प्रहार गरे । उसका लुंगी एनगिडी, ताबरेज शाम्सी र एन्डिले फेहलुकवायोले दुई/दुई, एडेन माक्रम र केशव महाराजले एक/एक विकेट लिए ।

त्यसअघि बोल्यान्ड पार्क पार्लमा टस जितेर ब्याटिङ रोजेको घरेलु टोली दक्षिण अफ्रिकाले निर्धारित ५० ओभरमा ४ विकेट गुमाउँदै २९६ रन बनाएको थियो । उसका लागि रस्सी भान डेर डुसेन र कप्तान टेम्बा बाभुमाले शतकीय पारी खेले । डुसेन ९६ बलमा ९ चौका र ४ छक्कासहित १२९ मा अविजित रहे । ११० रन बनाएका बाभुमाले १४३ बलमा ८ चौका प्रहार गरे । क्विनटन डि ककले २७ रन जोडे ।

चौथो विकेटका लागि डुसेन र बाभुमाले २०४ रनको साझेदारी गर्दै दक्षिण अफ्रिकालाई बलियो योगफलसम्म पुर्याएका थिए । भारतका लागि जसप्रित बुमराहले २ तथा रविचन्द्रन आश्विनले १ विकेट हात पार्दा १ विकेट रन आटका रूपमा प्राप्त भयो

यो जितसँगै तीन खेलको सिरिजमा दक्षिण अफ्रिकाले १-० को अग्रता लिएको छ । दोस्रो खेल शुक्रबार हुनेछ ।