
आगामी नयाँ वर्षदेखि पब्जी ब्याटलग्राउण्ड नि:शुल्क हुने भएको छ । ‘दी गेम अवार्ड्स २०२१’ को अवसरमा बिहीबार साँझ आगामी जनबरी १२ देखि पब्जी ब्याटलग्राउण्ड नि:शुल्क हुने जानकारी गराइएको हो ।
पब्जी ब्याटलग्राउण्ड नि:शुल्क खेल्न पाइने भएपछि शुल्क तिर्नेको लागि ब्याटलग्राउण्ड प्लस नामको नयाँ प्रिमियम खाता सार्वजनिक हुनेछ । ब्याटलग्राउण्ड प्लस खाताले खेलाडीहरूलाई अतिरिक्त आम्दानी गर्न सघाउनुका साथै कस्टम म्याच र अन्य बोनसको सुविधा दिनेछ । खाता अपग्रेड गर्न एक पटक १२.९९ अमेरिकी डलर शुल्क लाग्नेछ।
पब्जी ब्याटलग्राउण्ड् नि:शुल्क हुनुअघि नै शुल्क तिरेर खेलिरहेका खेलाडीले भने एक विशेष प्याकेज पाउनेछन् जसमा नि:शुल्क ब्याटलग्राउण्ड प्लस खाता अपग्रेड र अन्य सुविधा समावेश हुनेछ । पब्जीको यो नि:शुल्क भर्सन प्ले स्टेसन ४, प्ले स्टेसन ५, विन्डोज पिसी (स्टिम मार्फत ), एक्स बक्स वान, र एक्स बक्स सिरिज एक्समा उपलब्ध हुनेछ।