नेपालका लागि जापानी राजदूत किकुता युताकाले परराष्ट्रमन्त्री नारायण खड्कासँग मन्त्रालयमा शिष्टाचार भेटघाट गरेका छन् । भेटमा परराष्ट्रमन्त्री खड्कालाई बधाई दिदैं राजदूत किकुताले कार्यकालको सफलताको शुभकामना व्यक्त गर्दै जापानी विदेश मन्त्री मोतेगी तोसिमित्सुले पठाएको बधाई सन्देश हस्तान्तरण गरेका थिए ।

भेटमा मन्त्री खड्काले समकक्षीलाई बधाई सन्देश दिदैं प्रधानमन्त्री किसिदा फुमियोलाई शुभकामदा दिएका थिए । शुभकामना आदानप्रदानका क्रममा राजदूतले प्रधानमन्त्री देउवाबाट समकक्षीलाई पठाएको बधाइ सन्देशका लागि आभार व्यक्त गरे । विदेशमन्त्री मोतेगीको भने वर्तमान सरकारमा पुनर्नियुक्ती भएको हो । भेटमा मन्त्री खड्का र राजदूत किकुताले नेपाल र जापानबीचको द्विपक्षीय सम्बन्धको प्रगाढताबारे चर्चा गरेका थिए । राजदूत किकुताले पहिलोपटक नेपाली विद्यार्थीले जापानको भ्रमण गरेको आगामी वर्ष १२० वर्ष पुग्ने भन्दै नेपाल र जापानबीच अतुलनीय मित्रता रहेको उल्लेख गरेका थिए । नेपालको विकास, आपतकालीन सहयोग तथा कोभिड–१९ महामारी प्रतिकार्यमा जापानले सहयोग पुर्‍याएको उल्लेख गर्दै राजदूतले नेपालमा कोभिड–१९ भ्याक्सिन भण्डारणका लागि युनिसेफबाट निर्मित ‘कोल्ड चेन’ जापान सरकारको योगदान भएको बताए ।

जापानले कोभिड–१९ प्रतिकार्यका लागि मेडिकल सामग्रीसहित १६ लाख अष्ट्राजेनेका खोप उपलब्ध गराएको थियो । भेटमा राजदूत किकुताले नेपालको सामाजिक–आर्थिक विकासमा सहयोग गर्न जापान सधैं तयार रहेको भन्दै दुई देशको साझेदारीलाई थप उचाइमा पुर्‍याउँदै जनस्तरको सम्बन्धलाई प्रगाढ बनाउन भूमिका निर्वाह गर्ने बताए ।