माल्दिभ्समा जारी दक्षिण एसियाली फुटबल प्रतियोगिता साफ च्याम्पियनसिपमा अन्तर्गत आफ्नो तेस्रो खेलमा नेपालले महारथी टोली भारतको सामना गर्दैछ ।

पाँच टोली सम्मिलित साफ च्याम्पियनसिप राउण्ड रोविन प्रणालीमा सन्चालन भएको छ र लिगका शीर्ष दुई टोलीले फाइनल खेल्नेछन् ।

यसअघिका दुवै खेल जितेर अंकतालिकाको शीर्ष स्थानमा रहेको नेपालले साफको ऐतिहासिक फाइनल यात्रा तय गर्नका लागि आजको जित महत्वपूर्ण हुनेछ । नेपाल साफ च्याम्पियनसिपमा अहिलेसम्म फाइनलमा पुगेको छैन ।

माल्दिभ्सको राजधानीस्थित राष्ट्रिय रंगशालामा नेपाल र भारतबीचको खेल नेपाली समयअनुसार आज राती पौने १० बजे हुनेछ । त्यसअघि पौने ५ बजे हुने दिनको पहिलो खेलमा माल्दिभ्स र श्रीलंका आमने सामने हुनेछन् ।

नेपालले आफ्नो पहिलो खेलमा आयोजक तथा साविक विजेता माल्दिभ्सलाई १-० ले पराजित गरेको थियो भने त्यसको तीन दिनपछि भएको दोस्रो खेलमा श्रीलंकालाई ३-२ गोलअन्तरले हराएको थियो ।

कीर्तिमानी सातपल्टको उपधि विजेता भारत भने सुरुआती दुई खेलमा बराबरीको नतिजामा रोकिएको थियो । त्यसैले आजको नेपालविरुद्धको खेल भारतका लागि दवावपूर्ण रहनेछ । आज पराजित भएको अवस्थामा भारतलाई प्रतियोगिताको फाइनलमा पुग्न निकै नै कठिन हुनेछ ।

नेपाललाई भने कम्तिमा बराबरीले पनि फाइनलको नजिक पुर्‍याउनेछ । लिग चरणको अन्तिम खेलमा नेपालले बुधबार बंगलादेशसँग खेल्नेछ ।