बुटवल । बुटवलको कालिकानगरमा मंसिर १० गते कार दुर्घटना परी घाइते भएका १ जनाको मृत्यु भएको छ । दुर्घटनामा परी घाइते भएका देवदह नगरपालिका–२ का २९ वर्षीय बिपिन ज्ञवालीको उपचारको क्रममा सोमबार राती मृत्यु भएको इलाका प्रहरी कार्यालय बुटवलका प्रहरी प्रमुख प्रतित सिहं राठोरले जानकारी दिए ।

क्रिमशन अस्पतालबाट मंसिर १४ गते डिस्चार्ज भएका उनमा हिजो स्वास्थ्यमा केही समस्या देखिए पछि देवदह मेडिकल कजेल, देवदहमा भर्ना भएका थिए । ढाडमा भित्र चोट लागेका उनको उपचारको क्रममा सोमबार राती नै सोही अस्पतालमा मृत्यु भएको प्रहरी प्रमुख राठोरले बताए । दुर्घटनामा परी घाइते भएका कारका चालक सोही ठाउँका २१ वर्षीय सुरज सुनार भने सोही दिन साँझ नै डिस्चार्ज भएका थिए । उनलाई अनुसन्धानका लागि नियन्त्रणमा लिएको प्रहरीले जनाएको छ ।

बुटवलबाट भैरहवा तर्फ जाँदै बा १२ च ७४५६ गरेको कार तीव्र गतिका कारण कालिका मानव ज्ञान माविको अगाडी मंसिर १० गते दुर्घटना भएको थियो । तीव्र गतिको कार अनियन्त्रीत भई सडकको डिभाइडरमा ठोक्किएर सडकको अर्को लाइनमा पुगेको थियो । दुर्घटनाबाट कार क्षेतविक्षेत भएको छ ।