त्यस्तै पूर्वमन्त्री माया भट्ट, राज्यमन्त्रीहरु चुनकुमारी चौधरी, अर्चना गहतराज र मनाकुमारी साउद पनि नेकपा एसतिर सनाखत गर्न निर्वाचन आयोगको कार्यालय पुगेका छन्।

यस्तै प्रदेशसभामा एमालेका प्रमुख सचेतक दुर्गा कुमारी कामी, प्रदेशसभा सदस्य तारालामा तामाङ, कुलवीर चौधरी, अमरबहादुर साउद, बलबहादुर सोडारी र सुशीला बुढाथोकीले पनि नेकपा एस रोज्ने पक्का भएको छ।

निर्वाचन आयोगले एमाले विभाजनपछि दल रोज्न दिएको भदौ २२ सम्मको म्यादअघि नै सुदूरपश्चिममा दल रोज्न दिइएको हो। एमाले उपाध्यक्ष भीम रावलले तान्न सक्ने खतरा देखेर मंगलबारै उनीहरुलाई निर्वाचन कार्यालय पठाइएको हो।

प्रदेश सभामा एमालेका सभामुखबाहेक २४ सांसद छन्। विगतमा त्यहाँ १७ जना माधवकुमार नेपाल र सातजना केपी शर्मा ओलीको पक्षमा थिए।

माधव नेपालतिरका १७ मध्ये १३ जना नेकपा एसतिर खुलेका हुन्। त्यहाँकी आन्तरिक मामिला मन्त्री पूर्णा जोशीले मंगलबार १३ जनाले सनाखत गरेको बताउँदै यो संख्या केही दिनमा अझै बढ्न सक्ने बताएकी छन्।