अमेरिकाले अफगानिस्तानको पूर्वी क्षेत्रमा इस्लामिक स्टेट (आइएस) लाई लक्षित गरेर ड्रोन आक्रमण गरेको छ ।

ड्रोन आक्रमणमा आइएसका एक सदस्य मारिएको अमेरिकी सैनिक अधिकारीले बताएका छन् । मारिने व्यक्ति गएको बिहीबार काबुल विमानस्थलमा १३ अमेरिकी सैनिकसहित १७० भन्दा बढीको ज्यान जाने गरि भएको आक्रमणका योजनाकार रहेको दाबी छ ।

नानगहार प्रान्तमा भएको सो आक्रमणमा आइएस–के समूहका योजनाकारलाई निशाना बनाइएको उल्लेख छ ।

काबुल विमानस्थलको गेटमा बिहीबार भएको आत्मघाती बम आक्रमणको जिम्मा आइएस–के ले थिएको थियो ।

अहिलेसम्मको जानकारी अनुसार ड्रोन आक्रमणमा सर्वसाधारणलाई कुन क्षति नभएको अमेरिकाले बताएको छ ।

राष्ट्रपति जो बाइडेनको स्वीकृतिपछि आइएस–के का योजनाकारलाई निशाना बनाएर ड्रोन आक्रमण गरिएको अमेरिकी अधिकारीलाई उद्धृत गर्दै सिएनएनले उल्लेख गरेको छ ।

अमेरिकाको केन्द्रीय कमाण्डले जारी गरेको वक्तव्यमा निशानामै आक्रमण भएको र योजनाकार मारिएको दाबी छ ।

यसैबिच काबुलस्थित अमेरिकी दूतावासले सुरक्षा सचेतना जारी गर्दै काबुल विमानस्थलको गेट आसपासमा रहेका आफ्ना नागरिकसहितलाई तत्काल सुरक्षित स्थानमा जान भनेको छ ।