एमाले वरिष्ठ नेता माधव कुमार नेपालले आफू विचारमा अडिग योद्धा रहेको भन्दै मैदान छोडेर भाग्‍ने कुरा नहुने बताएका छन् । शनिबार काठमाडौंमा अखिल फोर्सको बृहत भेलालाई सम्वोधन गर्दै नेपालले आफू विचारमा अडिग योद्धा रहेको बताए । उनले कार्यकर्तालाई पनि त्यस्तै बन्‍न सुझाव दिँदै नेपालले आफूहरू मैदान छोडेर नभाग्ने बताए ।

उनले निरंकुश र स्वेच्छाचारी प्रवृत्तिको विरोध गर्दै मनपरी, बेलगाम, अराजक भएर नेतृत्व नचलोस् भनेर होसियार बनाउन कार्यकर्ताले भूमिका खेल्नुपर्ने उल्लेख गरे । नेता नेपालले आफूलाई विचारहीन र सिद्धान्तहिन व्यक्तिहरूको भीड तयार गर्न नचाहेको जिकिर गरे । नेपालले संविधानलाई कुल्चिने काम गर्नेविरुद्ध आफूहरू चुप लागेर नबस्‍ने बताए ।

सर्वोच्च अदालतले गलत काम सच्चाएको स्मरण गर्दै उनले कसैले जालझेल गरेर फेरि प्रधानमन्त्री बन्छु भनेर नलागे हुने टिप्पणी गरे । पार्टी अध्यक्ष केपी शर्मा ओलीप्रति लक्षित गर्दै उनले अहंकारले मान्छेलाई पतनको बाटो डोहोर्‍याउने बताए । उनले अब नेपालमा राजतन्त्र फर्काउने दिवास्वप्त नदेख्‍न चेतावनी दिए ।