डार्विन — उत्तरी अस्ट्रेलियाको नर्दन टेरिटोरीबाट ‘द भ्वाइस अस्ट्रेलिया २०२६’ मा सहभागी नेपाली मूलका कलाकार युङ मिल्ला ग्रान्ड फिनालेमा प्रवेश गरेपछि उनलाई टेरिटोरीका तर्फबाट बधाई तथा समर्थन व्यक्त गर्ने क्रम बढेको छ।

नर्दन टेरिटोरीका स्यान्डरसन क्षेत्रका विधायक तथा मन्त्री जिन्सन एन्टो चार्ल्स MLAले सामाजिक सञ्जालमार्फत युङ मिल्लाको सफलतामा खुसी व्यक्त गर्दै उनलाई टेरिटोरीको आफ्नै प्रतिभाका रूपमा प्रस्तुत गरेका छन्।

मन्त्री चार्ल्सले लेखेका छन्, “Our very own Yung Milla is through to The Voice Australia Grand Final!” उनले टेरिटोरियनहरूले युङ मिल्लाको प्रतिभा वर्षौंदेखि देख्दै आएको उल्लेख गर्दै अब उनले आफ्नो क्षमता पूरै अस्ट्रेलियालाई देखाइरहेको बताएका छन्। साथै उनले टेरिटोरीवासीलाई युङ मिल्लाको समर्थनमा उभिन आग्रह गरेका छन्।

युङ मिल्लाले ‘द भ्वाइस अस्ट्रेलिया’को सेमिफाइनलमा Men At Work को ‘Land Down Under’ लाई आफ्नै शैलीमा प्रस्तुत गरेका थिए। उनको प्रस्तुति डिड्जेरिडु, कोयर, व्यक्तिगत कथा र मौलिक र्‍यापको संयोजनमा तयार गरिएको थियो। प्रस्तुति क्रममा उनले आफ्नी आमालाई समेत भावनात्मक रूपमा सम्मान गरेका थिए।

प्रस्तुतिपछि प्रशिक्षक केट मिलर-हाइड्केले युङ मिल्लाको प्रस्तुति मौलिक र भावनात्मक रहेको भन्दै प्रशंसा गरेकी थिइन्। अर्का प्रशिक्षक रिचर्ड मार्क्सले उनको प्रस्तुतिले र्‍याप तथा संगीतको शैलीमा नयाँपन ल्याएको भन्दै उच्च प्रशंसा गरेका थिए।

युङ मिल्ला अहिले मेलानी सीको टिमबाट ग्रान्ड फिनालेमा पुगेका छन्। उनीसँगै डाइसा औडा, टोमी नोभाक र The 60Four अन्तिम चारमा पुगेका छन्।

‘द भ्वाइस अस्ट्रेलिया’को ग्रान्ड फिनाले आइतबार, २७ सेप्टेम्बर २०२६ मा हुने तय भएको छ। विजेताले १ लाख अस्ट्रेलियन डलर नगद पुरस्कारसँगै Hive Sound Studios को रेकर्डिङ तथा डेभलपमेन्ट प्याकेज प्राप्त गर्नेछन्।

युङ मिल्लाको ग्रान्ड फिनाले यात्रा नर्दन टेरिटोरीको स्थानीय संगीत समुदायका लागि पनि विशेष चासोको विषय बनेको छ। उनको सफलतापछि पाल्मरस्टनमा समेत सामुदायिक रूपमा समर्थन र ग्रान्ड फिनाले हेर्ने कार्यक्रमको तयारी भइरहेको स्थानीय रिपोर्टहरूमा उल्लेख छ।

मन्त्री चार्ल्सको सार्वजनिक समर्थनसँगै युङ मिल्लाको ग्रान्ड फिनाले यात्रा अहिले टेरिटोरीको संगीत प्रतिभा र स्थानीय समुदायको समर्थनसँग जोडिएको चर्चित विषय बनेको छ।

Pic Source: Jinson FB wall