पर्थ । अस्ट्रेलियामा विदेशी विद्यार्थीको संख्या कटौती, डिपेन्डेन्ट भिसामा कडाइ तथा आप्रवासन नियन्त्रणको वकालत गर्दै आएको वान नेशन पार्टीले पश्चिमी अस्ट्रेलियाको पर्थमा भएको उपनिर्वाचनमा ऐतिहासिक जित निकालेको छ।

पर्थको दक्षिणी क्षेत्रमा पर्ने Secret Harbour निर्वाचन क्षेत्रमा वान नेशनका उम्मेदवार लुक हर्डेजेन विजयी भएका हुन्। यो क्षेत्रमा लामो समयदेखि लेबर पार्टीको प्रभाव रहँदै आएको थियो। सन् १९८९ यता विभिन्न स्वरूपमा लेबरले जित्दै आएको यो क्षेत्र पछिल्लो निर्वाचनमा पनि लेबरकै सुरक्षित क्षेत्रका रूपमा रहेको थियो।

करिब ७४.५ प्रतिशत मत गणना हुँदा हर्डेजेनले ३९.१ प्रतिशत प्राथमिक मत प्राप्त गरेका थिए। लेबरकी जर्जिया ट्रीले २४.४ प्रतिशत र लिबरलका रायन रोबर्टसनले १७.३ प्रतिशत प्राथमिक मत पाएका थिए। प्राथमिक मतमा वान नेशनले ठूलो छलाङ लगाएको देखिएको छ।

प्राथमिक मतपछि दुई उम्मेदवारबीचको प्राथमिकताका आधारमा गरिएको गणनामा हर्डेजेनले लेबरकी ट्रीलाई ५७–४३ प्रतिशत ले पराजित गरेका छन्। यससँगै वान नेशनले पश्चिमी अस्ट्रेलियाको तल्लो सदनमा पहिलोपटक आफ्नो सिट सुरक्षित गरेको छ।

यो नतिजालाई अस्ट्रेलियाको राजनीतिमा वान नेशनको बढ्दो प्रभावको महत्वपूर्ण संकेतका रूपमा हेरिएको छ। पछिल्लो समय पार्टीले आप्रवासन, आवासको अभाव, जीवनयापनको बढ्दो लागतलगायतका मुद्दालाई जोडदार रूपमा उठाउँदै आएको छ।

विशेषगरी विदेशी विद्यार्थी तथा अस्थायी भिसा प्रणालीमा कडाइ गर्नुपर्ने, डिपेन्डेन्ट भिसामा प्रतिबन्ध लगाउनुपर्ने जस्ता मुद्दामा वान नेशनको धारणा रहेकाले पछिल्लो चुनावी सफलताले अस्ट्रेलियाको आप्रवासन नीतिमाथिको राजनीतिक बहसलाई थप प्रभाव पार्न सक्ने देखिएको छ।

लेबरको परम्परागत गढ मानिएको क्षेत्रमा भएको यो पराजयले सत्तारुढ पार्टीमाथि पनि दबाब बढाएको छ। पश्चिमी अस्ट्रेलियाका प्रिमियर रोजर कुकले यसअघि नै उपनिर्वाचनलाई पार्टीका लागि ‘फाइट फर आवर लाइभ्स’ का रूपमा वर्णन गरेका थिए।

वान नेशनका नेताहरूले भने यो परिणामलाई लेबरका लागि अब कुनै पनि निर्वाचन क्षेत्र सुरक्षित नरहेको सन्देशका रूपमा व्याख्या गरेका छन्। पार्टीको पछिल्लो सफलताले आगामी निर्वाचनमा पनि आप्रवासन र जीवनयापनसँग सम्बन्धित मुद्दा निर्णायक बन्न सक्ने संकेत गरेको छ।