अस्ट्रेलियाको संघीय सरकारले अस्ट्रेलियामै कार्यरत दक्ष आप्रवासी कामदारलाई स्थायी बसोबास (पीआर) प्रक्रियामा थप प्राथमिकता दिने निर्णय गरेको छ।

सरकारले कुल आप्रवासी संख्या घटाउने नीतिअनुसार हालै जारी गरिएको मन्त्रीस्तरीय निर्देशन ११९ (Ministerial Direction 119) मार्फत विदेशमा रहेका आवेदकभन्दा अस्ट्रेलियाभित्र रहेका दक्ष कामदारको भिसा आवेदनलाई प्राथमिकताका साथ प्रशोधन गर्ने व्यवस्था गरेको हो।

गृहमन्त्री Tony Burke ले जारी गरेको नयाँ निर्देशनले श्रम अभाव भएका क्षेत्रलाई केन्द्रमा राख्दै दक्ष भिसा आवेदनको प्रशोधन प्राथमिकता निर्धारण गरेको छ।

नयाँ व्यवस्थाअनुसार प्राथमिकताको क्रम यस प्रकार छः

• रक्षा (Defence) क्षेत्र
• स्वास्थ्य (Health)
• निर्माण (Construction)
• शिक्षा (Education)

यी क्षेत्रसँग सम्बन्धित पेशाहरूलाई उद्योग प्राथमिकता सूचीमा शीर्ष स्थानमा राखिएको छ। सरकारले यसबाट श्रम अभाव भएका क्षेत्रमा दक्ष जनशक्तिको आपूर्ति छिटो हुने र अस्ट्रेलियामा पहिलेदेखि योगदान दिइरहेका दक्ष कामदारलाई स्थायी बसोबासतर्फ अघि बढ्न सहज हुने अपेक्षा गरेको छ।

यो परिवर्तन विशेषगरी अस्ट्रेलियामै बसेर काम गरिरहेका दक्ष आप्रवासीका लागि सकारात्मक मानिएको छ, किनकि उनीहरूको पीआर आवेदन अब विदेशबाट आउने समान प्रकृतिका आवेदनभन्दा प्राथमिकताका साथ प्रशोधन गरिनेछ।