साउथ अस्ट्रेलियाका प्रिमियर पिटर मालिनाउसकास (Peter Malinauskas) ले अस्ट्रेलियालाई अझ धेरै दक्ष आप्रवासी कामदार आवश्यक रहेको बताएका छन्।

स्काई न्यूजसँगको अन्तर्वार्तामा उनले देशमा बढ्दो पूर्वाधार विकास र स्वास्थ्य सेवाको माग पूरा गर्न दक्ष जनशक्तिको आवश्यकता रहेको उल्लेख गरे।

‘हामीले धेरैभन्दा धेरै घर र अपार्टमेन्ट निर्माण गर्नुपर्छ। स्वास्थ्यसम्बन्धी पूर्वाधार विस्तार गर्नुपर्छ र ती प्रणालीलाई प्रभावकारी रूपमा सञ्चालनमा राख्नुपर्छ,’ उनले भने, ‘त्यसैले हामीलाई धेरैभन्दा धेरै दक्ष आप्रवासी कामदार चाहिन्छ।’

उनका अनुसार आवास निर्माण, स्वास्थ्य सेवा र अन्य अत्यावश्यक क्षेत्रमा देखिएको जनशक्ति अभाव पूरा गर्न दक्ष आप्रवासीले महत्वपूर्ण भूमिका खेल्नेछन्।

प्रिमियर मालिनाउसकासको यो अभिव्यक्तिलाई अस्ट्रेलियामा दक्ष आप्रवासनको आवश्यकता अझै कायम रहेको संकेतका रूपमा हेरिएको छ।