डार्विन (अष्ट्रेलिया) — अष्ट्रेलियाको नर्दन टेरिटोरीको राजधानी डार्विनमा आगामी जुन१३ तारिखका दिन भव्य ‘नेपाल महोत्सव २०२६’ आयोजना हुने भएको छ । गैर–आवासीय नेपाली संघ (एनआरएनए) नर्दन टेरिटोरीको आयोजनामा हुन लागेको यस महोत्सवले अष्ट्रेलियाको बहुसांस्कृतिक समाजमा नेपाली कला, संस्कृति र पहिचानलाई प्रवर्द्धन गर्ने लक्ष्य राखेको छ ।

‘एक देश,कथा अनेक’ (One Country, Many Stories) भन्ने मूल नाराका साथ आयोजना हुन लागेको यो महोत्सव डार्विनको प्रसिद्ध पर्यटकीय स्थल डार्विन वाटरफ्रन्टमा सञ्चालन हुनेछ । कार्यक्रममा नेपाली मौलिक कला–संस्कृति झल्काउने विभिन्न झाँकी, सांस्कृतिक नाचगान, खानाका परिकार तथा विशेष आकर्षणका रूपमा बालबालिकाहरूको ‘कुमारी नृत्य’ प्रस्तुत गरिने आयोजकले जनाएको छ । नेपालको पर्यटन प्रवर्द्धनका लागि नेपाल पर्यटन बोर्ड र क्यानबेरास्थित नेपाली दूतावासको समेत सहकार्य रहने बताइएको छ । महोत्सवले डार्विनमा रहेका नेपाली समुदायको एकता, संस्कृति र पहिचानलाई थप मजबुत बनाउने विश्वास लिइएको छ ।

एनआरएनए नर्दन टेरिटोरीका संयोजक त्रिलोचन सापकोटाले नेपाल महोत्सवलाई नेपाली समुदायको साझा पर्वका रूपमा मनाउन सबैलाई आग्रह गरेका छन् । उनले नेपाली समुदायसँगै विदेशी साथीहरूलाई समेत कार्यक्रममा सहभागी गराई नेपालको विविध संस्कृति चिनाउन अनुरोध गरेका छन् । त्यस्तै, नेपाल फेस्टिभल इभेन्ट कोअर्डिनेटर तथा एनआरएनए एनटीका डेपुटी कोअर्डिनेटर निरोज देवकोटा ले समुदायको सक्रिय सहभागिताले महोत्सवलाई अझ भव्य र समावेशी बनाउने बताएका छन् ।

यसैबीच, ‘नेपाल महोत्सव २०२६’ लाई सफल बनाउन एनआरएनए एनटीले आगामी मे ३० तारिख सामुदायिक परामर्श (Community Consultation) कार्यक्रम आयोजना गर्ने भएको छ । कार्यक्रममा समुदायका सदस्य, स्वयंसेवक, विद्यार्थी, कलाकार, प्रायोजक तथा शुभेच्छुकहरूलाई सहभागी भई आफ्नो सुझाव र विचार राख्न आग्रह गरिएको छ ।

📅 मिति: शनिवार, ३० मे २०२६

⏰ समय: साँझ ५:३० – ७:०० बजे

📍 स्थान: Jingli Water Gardens, Jingli, NT

“Your Voice Matters” भन्ने सन्देशसहित आयोजना हुन लागेको यस परामर्श कार्यक्रममा सबैको साथ, सुझाव र सहभागिताले नेपाल महोत्सव २०२६ लाई अझ ठूलो, उत्कृष्ट र समावेशी बनाउने आयोजकको विश्वास रहेको छ ।