राजन न्यौपाने/काठमाडौँ । अखिल नेपाल फुटबल संघ (एन्फा) र ए–डिभिजन क्लबहरूबीच लामो छलफलपछि यस वर्ष राष्ट्रिय लिग फुटबल आयोजना गर्ने र अर्को वर्षदेखि ए–डिभिजन लिगलाई होम एन्ड अवे फर्म्याटमा सञ्चालन गर्ने सहमति भएको छ।

सोमबार एन्फा कम्प्लेक्समा बसेको बैठकपछि एन्फाले पुस ९ गतेदेखि राष्ट्रिय लिग सुरु गर्ने र त्यसअघि मकवानपुरमा एन्फा प्रेसिडेन्ट लिग सञ्चालन गर्ने निर्णय गरेको हो। प्रेसिडेन्ट लिगबाट शीर्ष ४ टोलीले राष्ट्रिय लिगमा स्थान बनाउने छन्।

गत संस्करणको ए–डिभिजन लिगका शीर्ष ६ क्लब— चर्च ब्वाइज, मछिन्द्र, नेपाल पुलिस, जावलाखेल युथ, सातदोबाटो युथ र एनआरटी—सहित प्रेसिडेन्ट लिगबाट आएका ४ टोली गरी १० टिमबीच प्रतिस्पर्धा हुनेछ।

राष्ट्रिय लिगको विजेताले एएफसी च्यालेन्ज लिगमा नेपालको प्रतिनिधित्व गर्नेछ।
एन्फाका अनुसार अर्को वर्ष पुस ३ गतेदेखि सुरु हुने ए–डिभिजन लिग होम एन्ड अवे प्रणालीमा सञ्चालन हुनेछ।