नेकपा (माओवादी केन्द्र) का अध्यक्ष एवं पूर्व प्रधानमन्त्री पुष्पकमल दाहाल ‘प्रचण्ड’ ले सहकारी ठगी र संगठित अपराध मुद्दामा पुर्पक्षका लागि थुनामा रहेका राष्ट्रिय स्वतन्त्र पार्टी (रास्वपा) का सभापति रवि लामिछानेसँग भेट गरेका छन् । आज (बुधबार) नख्खु कारागार पुगेर प्रचण्डले लामिछानेसँग भेट गरेका हुन् । भेटका क्रममा समसामयिक राजनीतिक विषय र जेलमा आफूलाई दिइएको हैरानीको बारेमा कुरा भएको प्रचण्डले बताए ।

भेटपछि सञ्चारकर्मीहरुसँग संक्षिप्त कुराकानी गर्दै प्रचण्डले लामिछाने आफ्नो क्याविनेटमा दुई÷दुई पटक गृहमन्त्री भएकाले अभिभावकको नाताले भेट्न आएको बताए । उनले लामिछानेलाई भेट्न भैरहवा नै जाने मन भए पनि समय र परिस्थिति नमिलेर त्यो सम्भव नभएको बताए । भेटको क्रममा लामिछानेले आफूलाई भैरहवामा गोलघरमा जस्तैगरी राखिएको गुनासो गरेको पनि प्रचण्डले सुनाए । अहिले नख्खु आइसकेपछि भने बसाईँ, खानेकुरा र सबै व्यवस्थापन तुलनात्मक रुपमा राम्रो रहेको लामिछानेले सुनाएको पनि प्रचण्डले बताए ।

‘मेरो क्याविनेटमा दुईचोटीको गृहमन्त्री पनि हो उहाँ । अभिभावकको हैसियतले पनि मैले उहाँको स्थिति के छ भनेर बुझ्नु स्वभाविक नै थियो । भैरहवा पनि मिल्यो भने जान चाहेको थिएँ । समय, परिस्थिति नमिलेर मात्रै हो । आज भेट भयो । उहाँको भैरहवा बस्दाखेरीको स्थिति धेरै नै जटिल, उहाँको अनुहारमा पनि देखिन्छ । दुब्लाउनुभएको छ । भैरहवामा उहाँको भाषामा भन्ने हो भने झण्डै–झण्डै गोलघरजस्तै गरी राखियो मलाई । धेरै ठूलो पीडा भयो मलाई भन्ने थियो भैरहवाको बारेमा,’– उनले भने ।

साथै, लामिछानेले आफ्नो जस्तै मुद्दामा अरुले उन्मुक्ति पाइराखेको र आफूले भने अदालतले तोकेको बिगो बैंक जमानत दिएर बाहिर बसेर मुद्दा लड्छु भन्दा पनि नदिइएको गुनासो गरेको पनि प्रचण्डले बताए । ‘मेरैजस्तो केसमा अरुले चाहिँ उन्मुक्ति पाउने, थु्प्रैले मेरोभन्दा गम्भीर केसमा । मलाईमात्रै लखेटियो भन्ने उहाँको पहिलादेखि कै भनाइ थियो । अहिले पनि त्यो कुरा राख्नुभयो । मैले संसद्मा राखेको कुरा, सडकहरुमा बोलेको कुरा पनि मैले उहाँलाई भने,’– प्रचण्डले भने, ‘अदालतले नै तोकेको बिगो धरौटी राखेर म मुद्दा लड्छु भन्दाखेरी पनि मैले त्यति सुविधा पनि पाइनँ । सरकार र यो गठबन्धन मप्रति यतिधेरै अनुदार, यतिधेरै विभेद किन गर्यो, मैले बुझ्न सकेको छैन भन्ने छैन ।’