नेकपा (एमाले) का प्रभावशाली नेता तथा सांसदहरुले नै संघीय मामिला तथा सामान्य प्रशासनमन्त्री राजकुमार गुप्तालाई बर्खास्त गरिनुपर्ने लविङ थालेका छन् । मन्त्री गुप्ताको कारण सिंगो पार्टी पँक्ति र सरकार नै बदनाम भएको भन्दै उनीहरुले प्रधानमन्त्री एवम् पार्टी अध्यक्ष केपी शर्मा ओलीसमक्ष तत्काल बर्खास्त गरेर एक्शन लिन सुझाएका छन् ।

सरकारको एक वर्ष पुगेको सन्दर्भमा प्रधानमन्त्री ओली मन्त्रिपरिषद् पूनर्गठनको तयारीमा थिए । यही मुखमा आफ्नै पार्टीबाट आफू नेतृत्वको सरकारमा सहभागी गुप्ताले कर्मचारी सरुवा रोक्न र नियुक्ति दिलाउन ७८ लाख घुसको ‘डिल’ गरेको घटना बाहिरिएपछि प्रधानमन्त्री ओली पनि अप्ठ्यारोमा परेका छन् ।

पार्टीका प्रभावशाली नेताहरुले यत्रो अडियो नै बाहिरिएपछि तत्काल पदबाट हटाउन बालुवाटारसमक्ष लविङ थालेको एमालेनकिट उच्चस्रोतको दाबी छ । प्रधानमन्त्री ओली यतिवेला गृहजिल्ला झापामा छन् । उनी आजै साँझसम्म काठमाडौं आईपुग्ने बताईएको छ ।

मन्त्री गुप्ताले पनि प्रधानमन्त्री र पार्टी कमिटीले निर्देशन दिए तत्काल पदबाट राजीनामा दिन तयार रहेको प्रतिक्रिया दिएका छन् । यद्धपी उनले घुसको डिल गरेको भनेर बाहिरिएको अडियो आफ्नो स्वर नभएको र प्रविधिको दुरुपयोग गरिएको दाबी गरेका छन् ।

एआईको प्रयोग गरिएको भन्दै आफ्नो आवाज नभएको दाबी गरेका मन्त्री गुप्ताले समाचारको सत्यतामाथि नै प्रश्न उठाएका छन् । यो अडियो प्रकरणमा भूमि व्यवस्था, सहकारी तथा गरिबी निवारणमन्त्री बलराम अधिकारीपनि मुछिएका छन् । अडियोमा मन्त्री गुप्ताले भूमिमन्त्री अधिकारीको पनि नाम लिएको कारण उनीपनि प्रधानमन्त्री ओलीको नोटिसमा परेको बताईन्छ ।

अहिले विवादमा तानिएका मन्त्री गुप्तामात्रै नभएर मन्त्री अधिकारीपनि रेड जोनमा परेको चर्चा छ । प्रधानमन्त्री ओलीले पार्टीभित्र छलफल गर्ने र यस सम्बन्धमा सत्ता सहयात्री दल नेपाली कांग्रेसको पनि राय लिएर थप कदम चाल्ने भनिएको छ ।