नेपाल राष्ट्र बैंकको गभर्नर नियुक्तिमा सत्तारूढ दल नेपाली कांग्रेस र नेकपा (एमाले) बीच रसाकस्सी देखिएको छ । मन्त्रिपरिषद् बैठकले गभर्नर सिफारिसका लागि उपप्रधान एवं अर्थमन्त्री विष्णु पौडेलको अध्यक्षतामा समिति नै गठन गरेको थियो । उक्त समितिले अहिले गभर्नरको लागि सम्भावित व्यक्तिबारे अध्ययन गरिरहेको बताइएको छ । वर्तमान गभर्नर महाप्रसाद अधिकारीको पदावधि सकिन धेरै दिन बाँकी छैन । प्रधानमन्त्री केपी शर्मा ओलीले थाइल्याण्ड भ्रमणबाट फर्किनेबित्तिकै गभर्नर नियुक्ति गर्ने तयारी रहेको छ ।

यता गभर्नर बन्नका लागि बालुवाटार र बुढानीलकण्ठबी शक्ति संघर्ष नै चलिरहेको छ । नेकपा (एमाले) को तर्फबाट गभर्नरको लागि नीलम ढुंगाना र प्रकाशकुमार श्रेष्ठको नाम फाइनलजस्तै भएको स्रोतले बतायो । ढुङ्गाना राष्ट्र बैंकका डेपुटी गभर्नर र श्रेष्ठ योजना आयोगका सदस्य हुन् ।

त्यस्तै, नेपाली कांग्रेस (बुढानीलकण्ठ) को तर्फबाट भने ज्ञानेन्द्र ढुंगाना, गुणाकार भट्ट, रवीन्द्र पाण्डे र राजेन्द्रकिशोर क्षेत्रीको नाम चर्चामा रहेको छ । ढुंगाना नविल बैंकको सीइओवाट राजीनामा दिएर गभर्नरको लाइनमा बसेका हुन् । त्यसैगरी क्षेत्री पूर्वमुख्यसचिव हुन् । कांग्रेसबाट गभर्नको लाइनमा बलियो उम्मेदवार ढुङ्गाना र क्षेत्री नै रहेको स्रोतको दाबी छ । क्षेत्रीकै अनुकूलताका लागि व्यक्तिअनुसार मापदण्ड बनाइएको भन्दै सरकारको आलोचनासमेत भइरहेको छ । सरकारले गभर्नर नियुक्तिको मापदण्डबाट उमेर हद हटाएको छ । यसअघि गभर्नर नियुक्तिका लागि उमेर हद ६५ वर्ष तोकिएको थियो ।

गभर्नर नियुक्तिको लविङमा अहिले मुख्य शक्तिकेन्द्र बालुवाटार, बुढानीलकण्ठदेखि परराष्ट्रमन्त्री डा.आरजु राणा देउवा, कांग्रेस सांसद्् एवं खर्बपति व्यापारी विनोद चौधरीलागायत सक्रिय रहेका छन् । अर्थमन्त्रीको नेतृत्वमा रहेको सिफारिस समितिले ३ जनाको नाम मन्त्रिपरिषद्लाई सिफारिस गर्नेछ । सो मध्येबाट एक जनालाई मन्त्रिपरिाषद्ले गभर्नर नियुक्त गर्नेछ । गभर्नरको विषयलाई लिएर अहिले सत्तारुढ दल कांग्रेस–एमालेमा रसाकस्सी नै छ । कार्यकाल पूरा गरेर अवकाश जान लागेका अधिकारी पनि एमालेनिकट हुन् ।
@repotersnepal