नेपाली विद्यार्थी प्रकृति लम्सालको रहस्यमय मृत्युपछि छानबिनको माग गर्दै प्रदर्शनमा उत्रिएका नेपाली विद्यार्थीहरूमाथि दुर्व्यवहार गर्ने तथा नेपालकै बिरुद्ध अभिव्यक्ति दिने कलिङ्‌गा इन्स्टिच्यूट अफ इन्डस्ट्रियल टेक्नोलोजीका दुई महिला अधिकारीहरूको व्यवहारप्रति उक्त संस्थाका उपकुलपति शरनजीत सिंहले खेद प्रकट गर्दै माफी मागेका छन्। उपकुलपति सिंहले ती महिला अधिकारीहरूलाई सेवाबाट हटाएको जानकारी पनि दिएका छन्।

उनले मंगलबार यसबारे विज्ञप्ति सार्वजनिक कलेज परिसरमा भएको विद्यार्थीको मृत्यु तथा त्यसपछिको प्रदर्शनमा भएको अप्रिय घटनाबाट स्तब्ध भएको उल्लेख गरेका छन्।

‘हामी मध्ये केहीले आन्दोलनकारी विद्यार्थीहरूसँग गरेको व्यवहारप्रति खेद पनि व्यक्त गर्दछौं,’ उनले भनेका छन्।

विद्यार्थीहरूलाई माया गर्ने तथा उनीहरूलाई कहिल्यै अपमान नगरेको प्रतिबद्धता पनि उपकुलपति सिंहले गरेका छन्।

‘हाम्रा दुई अधिकारीहरूले गरेका टिप्पणीहरू अत्यन्त गैरजिम्मेवारपूर्ण छन्। उनीहरूले घटनाको क्षणमा दिएका भए पनि ती अभिव्यक्तिको हामी समर्थन गर्दैनौं। हामीले उनीहरूलाई सेवाबाट हटाएका छौं,’ उनले लेखेका छन्।

‘उनीहरुले आफ्नो व्यवहारको लागि माफी पनि मागेका छन् । हामी पनि जे भएको छ त्यसको लागि क्षमा चाहन्छौं र यसैले सम्पूर्ण नेपाली विद्यार्थी र जनताप्रति हाम्रो स्नेह र स्नेह व्यक्त गर्दछौं। हामी उनीहरूलाई त्यति नै माया गर्छौं जति हामी भारतका मानिसहरू र विश्वका मानिसहरूलाई माया गर्छौं,’ उनले लेखेका छन्।

उनले नेपाली विद्यार्थीहरूलाई तत्काल नियमित शिक्षामा सामेल हुन अपिल पनि गरेका छन्।