तोहुरा खातुनको ह्याट्रिकमा भुटानलाई हराउँदै साविक विजेता बंगलादेश साफ वुमन्स च्याम्पियनसिप २०२४ को फाइनलमा प्रवेश गरेको छ ।

त्रिपुरेश्वरस्थित दशरथ रंगशालामा आइतबार भएको पहिलो सेमिफाइनलमा बंगलादेशले भुटानमाथि ७-१ को एकपक्षीय जित हात पार्दै लगातार दोस्रो पटक फाइनल पुगेको हो । बंगलादेश समग्रमा तेस्रो पटक फाइनल पुगेको हो ।

सन् २०१६ मा पहिलो पटक फाइनल पुग्दा भारतसँग पराजित भएको भारतले २०२२ मा काठमाडौं भएको साफमा नेपाललाई हराएर उपाधि जितेको थियो । बंगलादेशले अब फाइनलमा नेपाल भारतबीच हुने दोस्रो सेमिफाइनलको विजेतासँग खेल्नेछ ।

दोस्रो सेमिफाइनल आजै साढे ६ बजे हुनेछ ।

पहिलो हाफमा तोहुरा र कप्तान सबिना खानुतले दुई-दुई गोल गर्दा रितु पोर्ना चक्माले एक गोल गरेकी थिइन् । तोहुराले दोस्रो हाफमा एक गोल थप्दै ह्याट्रिक पूरा गरिन् ।

पहिलो हाफमा बंगलादेशले भुटानमाथि ५-१ को अग्रता बनाएको थियो ।

बंगलादेशले पहिलो हाफमा सुरुवातदेखि नै भुटानमाथि दबाब बनाएको थियो । खेलको सातौं मिनेटमै रितु चक्माले तोहुरा खातुनको पासमा बक्सको ठिक बाहिरबाट उत्कृष्ट गोल गरिन् ।

१५औं मिनेटमा तोहुरा खातनुले सेउली अजमको पासमा गोल गर्दै बंगलादेशको अग्रता दोब्बर पारिन् । तोहुराले सेउलीबाट पाएको पासमा भुटानी खेलाडीलाई छल्दै बक्सबाहिरबाट उत्कृष्ट गोल गरिन् ।

२६औं मिनेटमा सबिना खातुनले मोनिका चक्माको पासमा गोल गर्दै बंगलादेशको अग्रता ३-० बनाइन् । त्यसअघि सबिनाको प्रहार पोष्टमा लागेर पर्किएको थियो । तर उनले अर्को मौका चुकाइनन् ।

३५औं मिनेटमा तोहुराले व्यक्तिगत दोस्रो गोल गरिन् । उनले बक्स बाहिरबाट बायाँ खुट्टाले उत्कृष्ट गोल गरिन् । ३७औं मिनेटमा सबिनाले पनि व्यक्तिगत दोस्रो गोल गरेपछि बंगलादेशले ५-० को अग्तरा बनायो ।

पहिलो हाफमा भुटानले पनि एक गोल फर्काए । ४१औं मिनेट भुटानकी फरवार्ड देकी लाजोमले गोल गरिन् । जारी साफमा लाजोमको यो आठौं गोल हो र उनी सर्वाधिक गोल गर्नेमा शीर्ष स्थानमा छिन् ।

यस बाहेक भुटानले पहिलो हाफमा गोल गर्ने दुई अवसर गुमाएको थियो । १८औं मिनेटमा देकी लाजोमले बंगलादेशी किपर रुपमा चक्मा अघि बढेको अवस्थामा गोल गर्ने अवसर पाएपनि सदुपयोग गर्न सकिन् ।

२३औं मिनेटमा भुटानकी नाम्ग्याल देमाले गोल गर्ने राम्रो अवसर पाएकी थिइन् । बक्स भित्र उनी अनमार्क रहेपनि उनको हानेको प्रहार बंगलादेशी किपरले बचाइन् ।

दोस्रो हाफमा भुटानले केही सुधारिएको प्रदर्शन गरेपनि गोल गर्न सकेन । ५७औं मिनेटमा तोहुरा खातुनले गोल गर्दै ह्याट्रिक पूरा गरिन् ।

जारी साफ च्याम्पियनसिपमा यो चौंथो ह्याट्रिक हो । यसअघि नेपालकी रेखा पौडेल र प्रीति राईले माल्दिभ्स विरुद्धको खेलमा ह्याट्रिक गरेका थिए । यस्तै भुटानकी देकी लाजोमले पनि माल्दिभ्स विरुद्ध ह्याट्रिक गरेकी थिइन् ।

७२औं मिनेटमा बंगलादेशका लागि सेउली अजमले सातौं गोल गरिन् ।