नेपाली फिल्म ‘शाम्बाला’लाई काठमाडौंमा भव्य प्रिमियर गरिएको छ । क्यूएफएक्सको छायाँ मल्टिप्लेक्समा आयोजित समारोहमा बलिउड स्टारहरु नवाजुद्दिन सिद्दिकी र अनुराग कश्यप आकर्षण रहे ।

निर्देशक मीनबहादुर भाम, कलाकार थिन्ले ल्हामो, सोनम तोप्दनेसहित कास्ट एण्ड क्रू सहभागि प्रिमियरमा सेलेव्रिटी र अन्य अतिथिको बाक्लो उपस्थिती रह्यो ।

प्रिमियर समारोहअघि संक्षिप्त मन्तव्य दिँदै भारतीय निर्देशक कश्यप र अभिनेता सिद्दिकीले नेपाली फिल्मको विकासक्रमको प्रशंसा गरे । सिद्दिकीले मीन भामजस्ता उदीयमान निर्देशकले गर्दा नेपाली फिल्मको भविष्य उज्वल रहेको बताए ।

फिल्म हेरिसकेपछि अनलाइनखबरसँगको संक्षिप्त प्रतिक्रियामा सिद्दिकी र कश्यपले फिल्मको प्रशंसा गरेका छन् । उनीहरुले निर्देशकीय पक्षको तारिफ गर्दै यसले नेपाली फिल्मको विकासमा टेवा पुग्ने बताए ।

रेडकार्पेटमा यी दुईसहित नेपाली कलाकारको समेत बाक्लो सहभागिता थियो । ‘शाम्बाला’ आगामी शुक्रबार देशब्यापी रिलिज तयारीमा छ । सोमबार मात्रै सिद्दिकी र कश्यप गोसाइकुण्ड र लाङटाङ भ्रमणमा जाने योजना छ ।