काठमाडौं। जनता समाजवादी पार्टीका अध्यक्ष उपेन्द्र यादवले संघीयता समावेशितामाथि नै ग्रहण लाग्ने हो कि आभास हुन थालेको बताएका छन्। मंगलबार रिपोटर्स क्लबको वार्षिकोत्सव कार्यक्रममा अध्यक्ष यादवले प्रादेशिक कानून नबनाइनु र बनेको कानून पनि कार्यान्वयनमा नआउनुले संघीय गणतन्त्र नै धरापमा पर्ने चिन्ता बढेको जिकिर गरे।

‘संघीय लोकतान्त्रिक गणतन्त्र लेख्न नपाइने तपाईंकै मन्त्रिपरिषदले गरेको निर्णय हेर्दा दुःख लागेको थियो,’ उनले भने, ‘संघीयता धरापमा पर्ने हो कि आशंका हुन थालेको छ।’ गाडी ठोक्किएर कता लडेको छ बुझ्न कठिन भइरहेको बताउँदै यादवले संघीय गणतन्त्रलाई संस्थागत गर्न राष्ट्रिय एकतामाथि जोड दिए। यादवले सरकारमा गएपछि प्राप्त उपलब्‍धीलाई जोगाउन नसकिएको पनि बताए।

‘मुलुकमा ट्रेडिसन नै बसेको छ,’ उनले भने, ‘आन्दोलन हामी गर्छौं। परिवर्तन पनि ल्याउँछौं। परिवर्तनपछि सरकारमा पनि जान्छौं। तर, त्यहाँदेखि के नपचेको हो। त्यसलाई जोगाउन सक्दैनौं।’ कम्‍युनिष्‍ट सरकार बन्दा जनताले ठूलो आसा गरेका भए पनि अपेक्षाकृत काम हुन नसकेको उनले बताए।

‘जनताले ठूलो आसा गरेका थिए। हामीले साथ दिँदा दुई तिहाइ बढी पुगेको थियो। विकास र समृद्धितर्फ अगाडि बढ्छ। विभिन्न सवालको समाधान हुन्छ। संविधान परिमार्जन भएर अगाडि बढ्छ र समृद्धि हुन्छ। अब नेपालीले धेरै दुःख गर्नुनपर्ला कि भन्ने थियो। बडा दुर्भाग्यको कुरा हो। अहिले आएर गाडी कता पल्टिएको छ। को कता ठोक्किए कोही लडेका छन्।’