काठमाडौं । भारतमा जारी एकदिवसीय विश्वकप क्रिकेट २०२३ को फाइनलमा आईतवार भारत र अस्ट्रेलिया भीड्दैछन् ।  फाइनल खेल आइतबार अहमदाबादस्थित नरेन्द्र मोदी स्टेडियममा नेपाली समय अनुसार दिउँसो सावा २ बजे हुनेछ ।  अस्ट्रेलिया सर्वाधिक उपाधि विजेता टिम हो । उसले हालसम्म ५ पटक विश्वकप जितेको छ । अस्ट्रेलियाले  १९८७, १९९९, २००३, २००७ र २०१५ मा विश्वकप जितेको थियो ।

भारतले यसअघि दुईपटक विश्वकप जितेको छ ।  भारतले पछिल्लो पटक महेन्द्र सिंह धोनीको कप्तानीमा सन् २०११ मा फाइनलमा श्रीलंकालाई हराउँदै उपाधि जितेको थियो । भारतले पहिलोपटक सन् १९८३ मा कपिल देवको कप्तानीमा भारतले विश्वकप जितेको थियो ।

दुवै टिम २० वर्षपछि विश्वकप क्रिकेटको फाइनलमा भीड्न लागेका हुन् । यसअघि यी दुई टिम सन् २००३ मा उपाधिका लागि भीडेका थिए, जसमा अष्ट्रेलियाले बाजी मारेको थियो । भारत घरेलु मैदानको फाइदा उठाउँदै तेस्रो पटक उपाधि जित्ने दाउमा छ । तर फाइनलमा अस्ट्रेलियालाई हराउन सहज भने हुनेछैन । अस्ट्रेलिया आठौंपटक फाइनलमा पुगेको हो । उसले पाँचपटक त उपाधि नै जितेको छ । भारत भने चौथोपटक फाइनल खेल्दै छ ।

भारतले जारी विश्वकपमा सबै १० खेल जितेको छ भने अस्ट्रेलियाले १० मध्ये आठ जितेको छ । तर शुरुवाती २ खेल हारेपछि अष्ट्रेलियाले जसरी आत्मविश्वासका साथ कम ब्याक गरेको छ, त्यसलाई पन्छाउन भारतलाई सहज हुनै छैन । तर भारतले यो विश्वकपमा जसरी सबै खेलहरुमा एकतर्फी जित निकालेको छ त्यसलाई चिर्न पनि अष्ट्रेलियालाई निकै कठिन छ, किनकी जुन आत्मविश्वास र लयका साथ भारत खेलिरहेको छ, त्यसले जस्तो सुकै टिमलाई हराउने सामथ्र्य राख्छ । यही विश्वकपको लिग चरणको खेलमा पनि भारतले अष्ट्रेलियालाई सहजै ६ विकेटले हराएको थियो ।
हेड टू हेडमा अष्ट्रेलिया अगाडि
हेड टू हेडमा अस्ट्रेलियाविरुद्ध भारतको रेकर्ड उत्साहजनक छैन । यसमा भारत कमजोर छ । दुई टिम हालसम्म १५० एकदिवसीय खेल खेलिसकेका छन् । जसमध्ये ८३ खेल अस्ट्रेलिया र ५७ भारतले जितेको छ । यी मध्ये आप्नो घरमा ३३ र अष्ट्रेलियाले ३८ खेल जितेको छ । न्यूट्रल भेन्युमा पनि अष्ट्रेलिया अघि छ । उसले १२ खेल जित्दा भारतले १० खेल जितेको छ । घरेलु मैदानमा भने भारतले कडा टक्कर दिने गरेको छ ।

भारतमा खेलिएका ७१ एकदिवसीय खेलमा भारतले ३३ खेल जितेको छ । यही वर्ष खेलिएका ७ मध्ये भारतले चार खेल जितेको छ ।  १० खेलमा नतिजा निस्कन सकेन् । विश्वकपमा दुई टिमबीच १३ खेल भएका छन् । जसमध्ये अस्ट्रेलियाले आठ र भारतले पाँच खेल मात्रै जितेको छ । यही विश्वकपमा भारतले अष्ट्रेलियालाई समूह चरणमा हराएको थियो ।