काठमाडौं । नेपाली क्रिकेट टिमका मुख्य प्रशिक्षक मोन्टी देशाईँले ओमानसँगको हारबाट सिक्दै टी–२० विश्वकप छनोटको सेमिफाइनल खेलमा कमब्याक गर्ने बताएका छन् ।

त्रिवि क्रिकेट मैदान कीर्तिपुरमा भएको खेलमा ओमानसँग ५ विकेटले पराजित भएपछि पत्रकारसित कुरा गर्दै उनले टिमले वर्षभर गरेको मेहनत र विश्वासले सेमिफाइनलको खेलमा कमब्याक गर्ने बताए ।

‘हामीले यो वर्षभरी निकै मेहनत गरेका छौं,’ उनले भने, ‘ह्यापी ड्रेसिङ रुममा भएका सबै सदस्यहरुमा हामीलाई विश्वास छ । हामीले हाम्रो भूमिकाको बारेमा कुरा गरेका छौं । हामी भोलि हरेक कुरालाई सुधार गर्दै कमब्याक गर्नेछौं ।’

ओमानसँगको हारले खेलाडी र आफू पनि दुखित रहेको उनले बताए । ‘खेलाडी पनि दुखी छन्, खेलाडी भन्दा पनि फ्यान दुखी छन्,’ देशाईँले भने, ‘हामीसँग २४ घण्टा छ । हामी त्यो सुधारेर भोलि खेल्नेछौं । भोलि पुन एउटा मौका छ ।’

ओमानले २ पटक टी–२० विश्वकप खेलेको छ । २०१६ र २०२१ मा विश्वकप खेलेको टिम भएकाले आजको खेलमा स्किल भर्सेस स्किलको प्रतिस्पर्धा देखिएको देशाईँले बताए । ‘हामीले हाम्रो विपक्षीलाई सम्मान गर्नुपर्छ,’ उनले भने, ‘उनीहरुले दुई पटक टी–२० विश्वकप खेलेका छन् । उनीहरुसँग अनुभव छ ।’

नेपालको विशेषत ब्याटिङ फ्लप हुँदा आजको योजना विफल भएको प्रशिक्षक मोन्टीले बताए ।  ‘आज हाम्रो केही योजनाहरु विफल भएकै हुन् । हामीले विकेट सम्हालेर अन्तिम ओभरसम्म जानुपर्नेमा योजना अनुरुप भएन’, उनले भने ।