रिलिजको पाँचौ दिनमा आइपुग्दा पनि फिल्म ‘पशुपति प्रसाद २ः भष्मे डन’को व्यापारिक रफ्तारमा कमी आएको छैन । कार्तिकको ४ गते अर्थात फूलपातिबाट रिलिजमा आएको यो फिल्मले बक्स अफिसमा बिष्फोटक व्यापारलाई कायमै राखेको छ ।

मंगलबार दशैंको टिकाको दिनमा मध्यान्न १२ बजेबाट फिल्मको शो राखिएको थियो । यो फिल्मले टिकाको दिनमा पनि व्यापारिक रफ्तारलाई बलियो रुपमा अगाडि बढाएको थियो ।

आज फिल्म रिलिज भएको पाँचौ दिन भएको छ । आज पनि फिल्मको व्यापार आक्रामक छ । विशेषगरि, समीक्षकबाट फिल्मले तारिफ पाएपछि दर्शकहरुमा पनि यो फिल्मप्रति भरोसा अझै बढेको छ । जसको प्रभाव बक्स अफिसमा देखिएको छ ।

फिल्मको निर्माणपक्षले पहिलो दिनमा फिल्मले २ करोड ४० लाखको कमाई गरेको आँकडा सार्वजनिक गरेको थियो । यसपछि भने फिल्मको व्यापारिक आँकडा सार्वजनिक गरिएको छैन ।

तर, आज बुधबारसम्म आइपुग्दा पनि हलमा दर्शकको चाप सुखद रहेकाले फिल्मले पनि व्यापारमा एउटै रफ्तार कायम गरिरहेको छ ।

दीपेन्द्र के खनालको निर्देशनमा तयार भएको फिल्मलाई खगेन्द्र लामिछानेले लेखन तथा निर्माण गरेका हुन् । फिल्ममा विपिन कार्की, सौगात मल्ल, स्वस्तिमा खड्का, प्रकाश घिमिरे, रविन्द्र सिंह बानियाँ, लोकेन्द्र लेखक लगायतका कलाकारको अभिनय छ ।

यो फिल्मले पशुपति परिसरमा भष्मे डनको यात्रा, कसरी उसको जीवनमा परिवर्तन आउँछ भन्ने कथालाई प्रस्तुत गरेको छ । फिल्मको क्लाइमेक्समा राखिएको सस्पेन्स पाटोले फिल्मप्रति दर्शकको उत्साह अझै बढेको छ भने तेश्रो श्रृङ्खलाको माग पनि दर्शकले गरिरहेका छन् ।