काठमाडौं । चार देशसम्मिलित महिला टि २० आई सिरिजमा घरेलु टोली मलेसियासँग ६ विकेटले पराजित भएपनि नेपाल फाइनलमा पुगेको छ । नेपाल हारका बाबजुद नेट रनरेटमा शीर्षस्थानमा रहँदै फाइनलमा पुगेको हो । तर नेपाललाई जिते पनि मलेसिया भने बाहिरिएको छ ।

जितका लागि ८५ रनको मध्यम लक्ष्य मलेसियाले १६.२ ओभरमा ४ विकेट गुमाउँदै पूरा गर्यो । मलेसियाको जितमा ऐना हामिजाह हाशिम ३९ बलमा ३ चौकासहित ३७ रनमा बनाएर नटआउट रहिन् । यस्तै महिराह इजाती इस्माइलले २४ बलमा १ चौकासहित २१ रन बनाइन् ।

मलेसियाले ओपनर वान जुलिया वान मोहम्मद रशिदलाई ८ र तेस्रो नम्बरकी ब्याटर तथा कप्तान मास एलिसालाई २ रनमै गुमाएको थियो ।तर तेस्रो विकेटका लागि हाशिम र महिराहले ४३ रनको साझेदारी गर्दै जितको आधार तय गरे । नेपालकी पूजा महतो, रुविना क्षेत्री र सीता रानामगरले एक–एक विकेट लिए ।

त्यसअघि मलेसियाको बायोमास ओभलमा टस हारेर पहिला ब्याटिङको निम्तो पाएको नेपालले निर्धारित १८ ओभरमा ७ विकेट गुमाउँदै ८३ रन बनाएको थियो । वर्षाको कारण खेल प्रभावित हुँदा  दुई ओभर खेल घटाइएको थियो । त्यसैले डकवर्थ लेविस पद्धतिको आधारमा नेपालले ८५ रनको लक्ष्य दिएको थियो । नेपालको लागि कप्तान रुविना क्षेत्री बेलबासेले २६ बलमा २ चौका र १ छक्कासहित सर्वाधिक २३, इन्दु बर्माले ३३ बलमा २० रनको योगदान दिइन् ।  काजोल श्रेष्ठ २१ बलमा १ चौकासहित १८ रनमा आउट भइन् ।  सीता रानामगर १३ बलमा ९ रन बनाउँदै आउट भइन् ।

कविता जोशी ४ रनमा नट आउट रहिन् । कविता कुँवर १ र सम्झना खड्का २ रनमा आउट भइन् । नेपालले ओपनर विन्दु रावललाई नौं नम्बरमा ब्याटिङ गराएको थियो । उनी १ रनमा नटआउट रहिन् ।मलेसियाकी ऐना हामिजाह हाशिमले ४ ओभरमा १३ रन खर्चेर २ विकेट लिइन् । नुर दानैआ सामादले ४ ओभरमा २० रन खर्चेर २ विकेट लिइन् । महिराह इजाती इस्माइलले ४ ओभरमा २३ रन खर्चेर २ विकेट लिइन् ।

नेपाल ३ खेलमा २ मा जित र १ मा हारसहित ४ अंकका साथ शीर्ष स्थानमा रह्यो । हङकङ ३ खेलमा २ मा जित र १ मा हारसहित ४ अंकका साथ दोस्रो स्थानमा रहँदै फाइनल प्रवेश गर्यो ।
नेपालले पहिलो खेलमा हङकङलाई ६ विकेट र दोस्रो खेलमा कुवेतलाई ३४ रनले हराएको थियो । नेपालले सोमबार थाईल्यान्डसँग पनि अभ्यास खेल खेल्नेछ । नेपालले आइसिसी महिला टि२० विश्वकप एसिया क्षेत्र छनोट अघि अभ्यास खेल खेलेको हो । एसिया क्षेत्र छनोट अगष्ट ३१ देखी ९ सेप्टेम्बरमा मलेसियामा खेल्नेछ ।

नेपालको समूहमा युएई, कतार, मलेसिया, भुटान र बहराइन छन् । समूह बी मा चीन, हङकङ, कुवेत, म्यानमार र थाईल्यान्ड छन् । शीर्ष दुई टोली सेमिफाइनल खेल्नेछन् ।फाइनल पुग्ने दुई टोलीले २०२४ मा ग्लोबल महिला टि२० विश्वकप खेल्न पाउनेछन् । नेपालले पहिलो खेलमा ३१ अगष्टमा मलेसिया, १ सेप्टेम्बरमा बहराइन, ३ सेप्टेम्बरमा भुटान, ४ सेप्टेम्बरमा कतार र ६ सेप्टेम्बरमा युएईसँग खेल्नेछ ।