काठमाडौं ।  नेपालकी सीता रानामगरले सानदार प्रदर्शन गर्दै पाँच विकेट लिएपछि नेपालले हङकङलाई ८४ रनमा अलआउट गरेको छ   ।

चार देश सम्मिलित महिला टी २०  आई खेलमा हङकङले नेपाललाई ८५ रनको सामान्य लक्ष्य दिएको हो । मलेसियाको बायोमास ओभलमा टस हारेर पहिला ब्याटिङ गरेको हङकङ १९ दशमलब १ ओभरमा ८४ रनमा अलआउट भयो ।
हङकङको लागि यिंग चानले २९ बलमा २ चौका र १ छक्कासहित सर्वाधिक ३४ रन बनाइन् । नेपालका स्पिनर सीता रानामगरले ४ ओभरमा १६ रन खर्चेर ५ विकेट लिइन् ।

सीता नेपाली महिला टी २०  आई क्रिकेटमा पाँच विकेट लिने चौथो बलर हुन् । यसअघि २०१९ मा अन्जली चन्दले माल्दिभ्स र नेरी थापाले हङकङविरुद्ध ६–६ विकेट लिएका थिए । गतवर्ष अस्मिना कर्माचार्यले युएईविरुद्ध पाँच विकेट लिएकी थिइन् ।

इन्दु बर्माले २, कविता कुँवर र कप्तान रुविना क्षेत्री बेलबासेले समान १–१ विकेट लिए । डेब्यू खेलमा पुजा महतोले ३ ओभरमा ५ रन खर्चेर १ विकेट लिइन् ।